Doktorantlar stipendiyasi 1,7 barobarga oshirilishi mumkin

Prezident Shavkat Mirziyoyev ilmiy kadrlar tayyorlash tizimini takomillashtirish va ilm-fan samaradorligini oshirishga qaratilgan takliflar taqdimoti bilan tanishdi. Bu haqda Prezident matbuot xizmati xabar berdi.

 

Qayd etilishicha, so‘nggi yillarda O‘zbekistonda ilm-fan sohasini qo‘llab-quvvatlash, xalqaro raqobatbardoshlikni oshirish va ilmiy faollikni kuchaytirish bo‘yicha qator islohotlar amalga oshirilgan. Natijada xalqaro jurnallarda chop etilayotgan maqolalar soni hamda yuqori reytingli nashrlardagi tadqiqotlar ulushi ortib bormoqda.

 

Taqdimotda ilmiy kadrlar tayyorlash tizimini yangi bosqichga olib chiqishga qaratilgan bir qator tashabbuslar muhokama qilindi. Xususan, sun’iy intellekt, qayta tiklanuvchi energiya, oziq-ovqat xavfsizligi, tibbiyot, suv resurslari, yangi materiallar va seysmologiya kabi ustuvor yo‘nalishlar uchun ilmiy kadrlar tayyorlashning yangi tizimini joriy etish taklif qilindi.

 

Shuningdek, mazkur yo‘nalishlardagi doktorantlar stipendiyasini 1,7 barobarga oshirish hamda tadqiqotlarda foydalaniladigan asbob-uskunalar va reagentlar xaridi uchun har yili qo‘shimcha mablag‘ ajratish rejalashtirilayotgani bildirildi.

 

Taqdimotda ilmiy rahbarlarni rag‘batlantirishning natijaga yo‘naltirilgan mexanizmini joriy etish taklifi ham ilgari surildi. Unga ko‘ra, muvaffaqiyatli himoya qilingan dissertatsiyalar bo‘yicha ilmiy rahbarlarning xalqaro ilmiy faollik ko‘rsatkichlari ham inobatga olinadi.

 

Bundan tashqari, “Loyiha doirasida ilmiy daraja” va “Amaliy doktorantura” dasturlarini yo‘lga qo‘yish taklif qilindi. Mazkur yondashuvga ko‘ra, PhD tadqiqotlari iqtisodiyotning real sektori ehtiyojlaridan kelib chiqib shakllantiriladi va korxonalar bilan hamkorlikda amalga oshiriladi.

 

Taqdimotda ilmiy loyihalarni moliyalashtirish tizimini takomillashtirish, xalqaro ekspertlarni jalb qilish, ilmiy faoliyatni monitoring qilishning yagona raqamli tizimini joriy etish hamda akademik halollik mexanizmlarini kuchaytirish masalalari ham muhokama qilindi.

 

Prezident taqdim etilgan takliflarni puxta ishlab chiqish, ilmiy tadqiqotlar sifatini oshirish va ilmiy kadrlar tayyorlash tizimini zamonaviy talablar asosida takomillashtirish muhimligini ta’kidladi.