Eron prezidenti internet cheklovlarini bekor qilishni buyurdi
Mamlakatda internet 87 kundan beri uzilib qolgan.
Tasnim axborot agentligi xabariga ko‘ra, prezident tomonidan Aloqa vazirligiga internet tarmoqlarini qayta tiklash yuzasidan buyruq yuborilgan. Eron hukumati vakillari ham ushbu qarorni tasdiqlagan.
Ma’lumotlarga ko‘ra, mamlakatdagi internet cheklovlarini bekor qilish masalasi hukumat darajasida muhokama qilingan yig‘ilishda barcha tegishli idoralar internetga kirishni tiklash bo‘yicha qarorni qo‘llab-quvvatlagan.
Eron Axborot boshqarmasi rahbari Ali Ahmadniya ijtimoiy tarmoqlarda internetga ulanishni tiklash jarayoni tasdiqlanganini ma’lum qilgan. Uning ta’kidlashicha, qaror ijrosi bosqichma-bosqich amalga oshiriladi.
ISNA agentligi xabariga ko‘ra, mazkur qarorning amaliy ijrosi yaqin vaqt ichida boshlanishi kutilmoqda.
NetBlocks monitoring tashkiloti ma’lumotlariga ko‘ra, Eronda internet cheklovlari 80 kundan ortiq davom etib, bu global miqyosda eng uzoq davom etgan uzilishlardan biri sifatida qayd etilgan.
