Toshkentda soliq inspeksiyasi xodimlari pora bilan ushlandi
Ular kelib tushgan murojaat bo'yicha ma’muriy bayonnoma rasmiylashtirmaslik evaziga pora talab qilgani aniqlandi.
Davlat xavfsizlik xizmatining Toshkent shahar boshqarmasi xodimlari tomonidan Iqtisodiy jinoyatlarga qarshi kurash departamenti bilan hamkorlikda o‘tkazilgan tezkor tadbirda Toshkent shahrining Bektemir tumanida soliq inspeksiyasi xodimlarining korrupsiya bilan bog‘liq noqonuniy harakatlari fosh etildi. Bu haqda DXX Zamon.uz'ga ma'lum qildi.
Aniqlanishicha, Bektemir tumani soliq inspeksiyasining sho‘ba boshlig‘i mahalliy tadbirkorga tegishli savdo do‘konida xaridorga savdo cheki berilmagani yuzasidan murojaat kelib tushganidan xabardor bo‘lgan. Mansabdor shaxs xizmat mavqeidan foydalangan holda ushbu holat bo‘yicha ma’muriy bayonnoma rasmiylashtirmaslik hamda ishni sudga yubormaslik evaziga 4 million so‘m miqdorida pora talab qilgan.
Tezkor tadbir davomida u mazkur pul mablag‘ini soliq inspeksiyasi inspektori orqali olayotgan vaqtida ashyoviy dalillar bilan qo‘lga olingan.
Shuningdek, tergovga qadar tekshiruv harakatlari davomida ushbu inspektor joriy yilning aprel oyida aynan shu do‘konda boshqa bir xaridorga savdo cheki berilmagani yuzasidan kelib tushgan murojaatni ko‘rib chiqmaslik evaziga 1,5 million so‘m olgani ham aniqlangan.
Hozirda mazkur holat yuzasidan soliq inspeksiyasi xodimlariga nisbatan jinoyat ishi qo‘zg‘atilib, tergov harakatlari olib borilmoqda.
