Toshkentdagi 119 ta masjidda Qurbon hayiti namozi o‘qiladi
Shu sababli 26-may soat 24:00 dan 27-may 08:00 ga qadar poytaxtning qator ko‘chalarida avtomobillar harakati vaqtincha cheklanadi.
O‘zbekiston Musulmonlari idorasining joriy yilda muborak Qurbon hayitining birinchi kuni 27-may, chorshanba kuniga to‘g‘ri kelishi haqidagi axboroti asosida poytaxtdagi 119 ta masjidda hayit namozlari ado etilishi kutilmoqda. Bu haqda Toshkent shahar IIBB matbuot xizmati xabar berdi.
Hayit namozlarini yuqori saviyada va tartibli tashkil etish, jamoat xavfsizligini ta’minlash hamda fuqarolar uchun qulay sharoit yaratish maqsadida 26-may soat 24:00 dan 27-may soat 08:00 ga qadar Toshkent shahrining qator ko‘chalarida avtomobillar harakati vaqtincha cheklanadi.
Xususan, Mirzo Ulug‘bek, Bektemir, Olmazor, Shayxontohur, Chilonzor, Uchtepa, Yunusobod, Yakkasaroy, Sergeli, Yashnobod va Mirobod tumanlaridagi yirik masjidlar atrofidagi asosiy ko‘chalarda transport harakati vaqtinchalik to‘xtatiladi.
Cheklovlar “To‘rabuva”, “Xo‘tan”, “Alibek”, “Islomobod”, “Hazrati Imom”, “Do‘stjonboy”, “Shayx Zayniddin”, “Xo‘ja Alambardor”, “Ko‘k ota”, “Ubay ibn Ka’b”, “Shayx Muhammad Sodiq Muhammad Yusuf”, “Novza”, “Abdulloh ibn Mas’ud”, “Hazrati Ali”, “Minor”, “Mirzo Yusuf”, “Usmon bin Ma’zun”, “Nurul Islom”, “Islom ota” hamda “Qo‘yliq ota” masjidlari yaqinidagi ko‘chalarda amal qiladi.
Shuningdek, 27-may kuni Qurbon hayiti munosabati bilan poytaxt jamoat transportlari o‘z faoliyatini tonggi soat 04:00 dan boshlaydi.
