Toshkentda pullik avtomobil yo‘llari quriladi
Poytaxtda 100 km ga yaqin halqa va yangi aeroport yo‘nalishida pullik yo‘llar qurish loyihasi Xitoy kompaniyasi bilan muhokama qilindi.
Xitoyga amalga oshirilgan rasmiy tashrif doirasida Toshkent shahar hokimi Shavkat Umurzakov boshchiligidagi delegatsiya “China Railway Construction Corporation” rahbariyati bilan uchrashuv o‘tkazdi. Bu haqda Toshkent shahar hokimligi matbuot xizmati xabar berdi.
Muzokaralar chog‘ida poytaxtning transport va shaharsozlik infratuzilmasini rivojlantirish, kompleks renovatsiya qilish hamda ekologik standartlarga mos zamonaviy yechimlarni joriy etish masalalari ko‘rib chiqilgan.
Tomonlar Toshkent shahrida qo‘shimcha pullik avtomobil yo‘llarini barpo etish loyihalarini muhokama qilgan. Xususan, taxminan 100 kilometr uzunlikdagi halqa yo‘l hamda kelgusida qurilishi rejalashtirilayotgan yangi xalqaro aeroport yo‘nalishida shaharning markaziy qismidan o‘tuvchi magistral pullik yo‘l qurish imkoniyatlari ko‘rib chiqilgan.
Shuningdek, uchrashuvda “China Railway Construction Corporation” kompaniyasining tajribasi asosida ijtimoiy infratuzilma obyektlari — zamonaviy maktablar, bolalar bog‘chalari, tibbiyot muassasalari hamda boshqa ijtimoiy ahamiyatga ega inshootlarni barpo etish bo‘yicha ham hamkorlik masalalari muhokama qilingan.
