Raqobat qo‘mitasi Qurbon hayitida oziq-ovqat narxlarni oshirmaslikka chaqirdi
Savdo tarmoqlari narx o‘zgarishlari haqida qo‘mitani tezkor xabardor qilib boradi.
Raqobat qo‘mitasi yirik savdo tarmoqlari hamda respublika hududlaridagi savdo komplekslariga Qurbon hayiti arafasida ijtimoiy ahamiyatga ega oziq-ovqat mahsulotlari narxlarini barqaror saqlash yuzasidan murojaat yo‘lladi.
Qo‘mita matbuot xizmatiga ko‘ra, bayram arafasida talab keskin ortishi mumkin bo‘lgan asosiy oziq-ovqat mahsulotlari narxlarining asossiz oshib ketishining oldini olish, yetkazib beruvchilar tomonidan narx o‘zgarishlari, logistika xarajatlari hamda boshqa omillar haqida qo‘mitaga tezkor ma’lumot taqdim etib borish bo‘yicha tegishli ko‘rsatmalar berilgan.
Shuningdek, chakana savdo tarmoqlari va hududlardagi savdo komplekslari yetkazib beruvchi korxonalarni asossiz narx oshirish holatlariga yo‘l qo‘ymaslik yuzasidan ogohlantirib borishi zarurligi ta’kidlangan.
Raqobat qo‘mitasi aholi uchun muhim bo‘lgan ijtimoiy ahamiyatga ega oziq-ovqat mahsulotlari narxlarining barqarorligini ta’minlash bo‘yicha o‘z vakolatlari doirasida zarur choralarni ko‘rib borishini ma’lum qilgan.
