Inyesta o'ziga shaxsiy klub sotib oldi
Sobiq futbolchi jamoani yaxshilashga va rivojlantirishga harakat qilishini aytgan.
“Barselona” klubi va Ispaniya terma jamoasining sobiq futbolchisi Andres Inyesta “Xelsingyor” futbol klubi egasiga aylandi.
“Futbol va umuman sport meni o‘ziga tortadigan narsa. Faoliyatim davomida to‘plangan tajribamni ushbu klubga olib kelmoqchiman. Men jamoani yaxshilashga va rivojlantirishga harakat qilaman", - dedi Inyesta.
Qayd etish joiz, “Xelsingyor” Daniyaning uchinchi divizionida ishtirok etadi. Ushbu klub 2005-yilda tashkil topgan.
Andres Inyesta faoliyatining asosiy qismini "Barselona"da o‘tkazgan. Keyin esa Yaponiyaning “Vissel Kobe” va Birlashgan Arab Amirliklarining “Emireyts” klublarida o‘ynagan. U o‘tgan oy professional futbolchilik faoliyatini yakunlaganini e’lon qilgan edi.
