Noyerning tarixiy xatosi “Bavariya”ga qimmatga tushdi
Myunxenliklar o‘z uyida Alonso jamoasiga mag‘lub bo‘lishdi.
"Bavariya" va "Bayer" Germaniya kubogi 1/8 finalida o'zaro bahs olib borishdi. Uchrashuvni ikkala jamoa nominal markaziy hujumchilarsiz boshlashdi. "Bavariya"da Harri Keyn Dortmundning "Borussiya"si bilan so'nggi uchrashuvda (1:1) jarohat olgandi. Markaziy hujumda Leroy Sane va Jamol Musiala almashib o'ynashdi. Xabi Alonso o'z navbatida Patrik Shikni zaxirada qoldirdi, Florian Wirts esa to'qqizlikdan joy oldi. Aynan u 11-daqiqada "Bayer" raqibga qarshi pressing uyushtirganidan keyin gol urishi mumkin edi. Wirtzga biroz aniqlik yetishmadi - to'p yaqin burchakdan o'tib ketdi. Shundan olti daqiqa o'tib tarixiy voqea sodir bo'ldi. "Bavariya" darvozaboni Manuel Noyer Jeremi Frimpongga nisbatan qoidabuzarlik ishlatdi. Hakam Xarm Osmers esa 38 yoshli darvozabonni qizil kartochka bilan "taqdirladi". Bu Noyerning faoliyatidagi ilk chetlatilish edi.
Shundan so'ng Vensan Kompani Saneni o'yindan oldi va uning o'rniga zaxira darvozaboni Daniel Peretsni maydonga tushirdi. "Bavariya" o'n kishi bo'lib qoldi, ammo baribir raqib darvozasi oldida vaziyatlar yaratdi. "Bayer"da ham qator imkoniyat yuzaga keldi, biroq Perets Frimpongning yaqin burchakka yo'llagan zarbasini oyog'i bilan qaytarishga muvaffaq bo'ldi. Tanaffus paytida Alonso nihoyat Shikni maydonga tushirdi. Achinarli tomoni shundaki, chexiyalik hujumchi atigi 15 daqiqa harakat qildi. Jarohat sabab Shik o'rnini Natan Tellaga bo'shatib berishga majbur bo'ldi. Bungacha mehmonlarda juda yaxshi imkoniyat yuzaga keldi. Biroq, Wirtzning bergan zarbasi darvozasi ustuni yonidan o'tib ketdi.
Tella zahiradan maydonga tushganidan sakkiz daqiqa o'tib, gol urishga muvaffaq bo'ldi. Alexandro Grimaldoning ajoyib uzatmasi keyin Tellaning yo'llagan zarbasini raqib darvozaboni qaytarishga ojizlik qildi. Shu tariqa Alonso yana bir yaxshi natijani qayd etdi. U murabbiylik faoliyatida biror marta ham "Bavariya"ga mag'lub bo'lmagan (ikki g'alaba, ikkita durang).
75-daqiqadagi statistika o'yinning maydonda taxminan teng kechayotganini ko'rsatdi. Jamoalarning har birida to‘qqiztadan zarba bor edi, ammo myunxenliklar to‘pga bir oz ko‘proq egalik qilishdi (54% ga nisbatan 46%). "Bavariya"ning barcha urinishlari tablodagi hisobning o'zgarishiga olib kelmadi. Jamoa Kompani qo‘l ostida ilk bor o‘z maydonida mag‘lub bo‘ldi. Bungacha u Chempionlar ligasida ikkita mag'lubiyat alamini totib ko'rgandi (ikkalasi ham safarda).
