Ulug‘bek Rashitov “yilning eng yaxshi erkak sportchisi” bo‘ldi
Sportchining g‘alabasi dunyo miqyosida eʼtirof etildi.
Butunjahon taekvondo federatsiyasi (Vt) 2024 yilning eng yaxshilarini aniqlash uchun sportchilar va murabbiylarning ovoz berish natijalarini eʼlon qildi.
Ovoz berish natijalariga ko‘ra, yilning eng yaxshi erkak sportchisi nominatsiyasida milliy terma jamoa aʼzosi, ikki karra Olimpiya o‘yinlari g‘olibi Ulug‘bek Rashitov g‘olib bo‘ldi.
Taqdirlash marosimi bugun Gonkongda davom etayotgan pumse bo‘yicha Jahon chempionati doirasida bo‘lib o‘tdi. Unda chempionimiz — Ulug‘bek Rashitov ham ishtirok etib, Butunjahon taekvondo federatsiyasi bosh kotibi Seo Jeongkangdan o‘z sovrinini qabul qilib oldi.
Taʼkidlash lozim, bu o‘zbek taekvondosining Yangi O‘zbekistonga keltirgan yangi g‘alabasiga aylandi. Boisi, bunga qadar yuqori natijalarga erishgan sportchilarimiz dunyo miqyosida eʼtirof etilmagan edi.
