Alisher Usmonov saylanganining ertasigayoq FIE prezidentligidan ketdi
Bu haqida FIE sayti maʼlum qildi.
Milliarder Alisher Usmonov o‘z ixtiyori bilan Xalqaro qilichbozlik federatsiyasi (FIE) prezidenti lavozimidagi faoliyatini to‘xtatdi.
Unda aytilishicha, Alisher Usmonov tashkilot samarali ishlashini taʼminlash maqsadida shunday qarorga kelgan. 2024 yil 1 dekabr kuni yig‘ilish o‘tkazgan FIE ijroiya qo‘mitasi federatsiyaning uzluksiz faoliyatini taʼminlash maqsadida Usmonovning qarorini qabul qilgan va ratifikatsiya qilgan. Emmanuel Katsiadakis federatsiyaning vaqtincha rahbari etib tayinlangan.
Eslatib o‘tamiz, 30 noyabr kuni Toshkentda Xalqaro qilichbozlik federatsiyasi prezidentligiga saylovda Alisher Usmonov g‘alaba qozongan edi. Uning nomzodi yuzdan ortiq davlat milliy federatsiyalari tomonidan qo‘llab-quvvatlangandi.
71 yoshli Alisher Usmonov 2008 yildan 2022 yilgacha FIE rahbari bo‘lgan. Ukrainadagi urush boshlangach, o‘ziga nisbatan joriy qilingan sanksiyalar ortidan ushbu lavozimni tark etgan edi.
