Eski do‘stlar yana uchrashishdi
Ronaldu va Benzema o‘rtasidagi o‘zaro bahsda “Al-Ittihod”ning qo‘li baland keldi.
Krishtianu Ronaldu va Karim Benzema Saudiya Arabistonidagi asosiy raqobatchilardan hisoblanadi. Bu esa futbolga befarq bo'lmagan barcha insonlarni o'ziga jalb qilishi aniq. Portugaliyalik hujumchi bilan birga to'p tepayotgan futbolchilar orasida Aymerik Laport, Mohamed Simakan, Marselo Brozovich, Otavio va Sadio Mane bor. Bosh murabbiy esa Stefano Pioli. Fransiyalik yuzduzning sheriklari esa Danilo Pereyra, Fabinyo, N'Golo Kante, Xousem Aouar, Stiven Bergvayn va Mario. Loran Blan klub bosh murabbiyi hisoblanadi.
"Al-Nasr" va "Al-Ittihod" jamoalari ishtirokidagi o'yin ancha keskin boshlandi. "Al-Nasr o'yin boshidan to'pga ko'proq egalik qildi, "Al-Ittihod" esa xotirjamroq ko'rindi. Darvozaga birinchi zarba faqat 19-daqiqada yo'llandi, Otavioda Brozovichning uzatmasidan so'ng yaxshi imkoniyat yuzaga keldi. Raqibning javobi ham uzoq kutilmadi. Ammo "Al-Ittihod" tomonidan urilgan gol ofsayd sabab bekor qilindi. Biroz vaqt o'tgach, Benzema uzoq burchakka zarba berdi, biroq Bento ushbu vaziyatni bartaraf etishga muvaffaq bo'ldi. Birinchi bo'lim davomida har ikkala jamoada yaxshi imkoniyatlar yuzaga keldi, ammo ayrim holatlarda jamoalar ehtiyotkorlikka urg'u qaratishdi.
Ikkinchi bo'lim anchagina qiziqarli voqealarga boy bo'ldi. Avvaliga “Al-Ittihod” tezkor hujum uyushtirdi. Mazkur vaziyatdan Benzema unumli foydalanib, jamoasini hisobda oldinga olib chiqdi. Biroq, javob goli uzoq kuttirmadi. Oradan ikki daqiqa o‘tib maydon markazidan boshlangan hujumni Krishtianu gol bilan yakunladi. Shu tariqa patugaliyalik futbolchi faoliyatidagi 916-golini kiritdi.
Shundan so'ng vaqti-vaqti bilan ketma-ket hujumlar uyushtirildi. Hakam Fakundo Tello 67-daqiqaga qadar yettita sariq kartochka ko'rsatdi, jumladan Karim Benzema ham bundan quruq qolmadi. Mane bahs yakunigacha yana bitta golli vaziyatni qo'ldan chiqardi. Qo'shib berilgan vaqtda esa Bergvayn jarima maydonchasida paydo bo'lib jamoasini yana hisobda oldinga olib chiqdi. Shu tariqa “Al-Ittihod” birinchi o‘rindagi o‘rnini yanada mustahkamlab oldi va “Al-Hilol”dan besh ochko oldinga uzib ketdi. “Al-Nasr” esa raqiblaridan sakkiz ochko ortda qolmoqda.
