Jamoa izlayotgan Pogba, yordamga muhtoj Pep va arosatdagi Reshford
Qishki transfer oynasida qanday yangiliklar kutilmoqda?
Tez orada Yevropada qishki transfer oynasi ochiladi. Ayni kunlarda barcha ommaviy axborot vositalari potentsial bitimlar haqida yozishmoqda. Yanvar oyida top klublarda qanday o'zgarishlar yuz berishi mumkin? Quyida shu haqida to'xtalib o'tamiz.
"Manchester Yunayted" Reshford bilan xayrlashadi
Markus Reshfordning "Manchester Yunayted" bosh murabbiyi Ruben Amorim bilan munosati yaxshi emas. Shu sababdan Amorim Markusni tarkibdan olib tashladi va u bilan xayrlashishga tayyor. "The Guardian" nashrining xabariga ko'ra, klub Reshfordni transferga qo'ygan. Rahbariyat yanvar oyida Markusni sotish haqida bosh qotirmoqda. Bir qator nashrlar Saudiya Arabiston jamoalari Rashfordga qiziqish bildirayotganini ta'kidlagan. Ammo, Markusning hozircha Yevropani tark etish niyati yo‘q.
Pogba qayerga boradi?
Pol Pogba “Yuventus”ni tark etdi. 2025-yilning mart oyida fransuz futbolchisi diskvalifikatsiya muddati tugaganidan keyin maydonga qaytish imkoniyatiga ega bo'ladi. Braziliyaning "Bolavip" nashri xabariga ko'ra, Pogba "Korintians" klubiga o'tishga rozilik bergan. Ammo, ayrim xabarlarga ko'ra, futbolchi "Marsel"ga o'tish haqida o'ylamoqda. Pogbaning fikricha, bu uning Fransiya terma jamoasiga qaytish imkoniyatini oshiradi.
Pep yordam oladi
"ESPN" nashri xabariga ko'ra, yanvar oyida "Manchester Siti" bironta yarim himoyachi sotib oladi. “Manchester Siti”ning ikkita asosiy varianti bor. Bular Martin Subimendi (“Real Sosedad”) va Bruno Gimaras (“Nyukasl”). Jamoa markaziy himoyachi, hujumchi va o'ng qanot himoyachisi sotib olish variantini ham ko'rib chiqmoqda.
"Yuventus" yirik xaridni amalga oshiradi
"Yuventus" mavsumni yaxshi o'tkazmoqda. Tyago Motta shogirdlari chempionatda peshqadam “Atalanta”dan 9 ochko ortda qolishmoqda. Chempionlik uchun kurashda klubga yangi xaridlar kerak bo'ladi. "La Gazzetta dello Sport" xabariga ko'ra, "Yuventus" Jakomo Raspadori bilan shartnoma imzolamoqchi. Turinliklar "Napoli" hujumchisini anchadan beri kuzatib kelishadi. Motta ham futbolchining o'yiniga yuqori baho bergan.
"Liverpul"ga qanot futbolchisi kerak
Trent Aleksandr-Arnold "Liverpul" bilan 2025-yilning yozida tugaydigan shartnomasini uzaytirmaydi. Muzokaralar qiyin kechmoqda, himoyachiga "Real" qiziqmoqda. Trentning o'zi klubni tark etishni xohlamoqda. Shu sababdan "Liverpul" unga o'rinbosar tayyorlamoqda. "Bild" nashriga ko'ra, mersisaydliklar "Bayer" himoyachisi Jeremi Frimpongning agenti bilan bog'lanishgan.
Arteta hujumchi izlayapti
"Arsenal" kuchli to'qqizlik futbolchisi yo'qligi sabab qiynalmoqda. Kay Xaverts ajoyib futbolchi, ammo baribir markaz hujumchisi emas. "Arsenal" rahbarlari ushbu pozitsiyaga nomzodlarni ko'rib chiqmoqda. Xabarlarga ko'ra, londonliklar Dushan Vlahovichni 2025-yilning yanvaridayoq sotib olish imkoniyatini ko'rib chiqmoqda. 24 yoshli futbolchining transfer qiymati 60 million yevro hisoblanadi.
Osimhen Premyer-ligaga keladimi?
Bir qator nashrlar tarqatgan xabarga ko'ra, "Manchester Yunayted" yanvar oyida Viktor Osimhenni sotib olishi mumkin. Qayd etilishicha, mankunianliklar futbolchining transferi haqida o'ylashmoqda.
