Krishtianu Ronaldu “Valensiya”ni sotib olmoqchi
U buni Muhammad bin Salmon bilan hamkorlikda amalga oshirmoqchi.
Portugaliyalik mashhur hujumchi Krishtianu Ronaldu Ispaniyaning nomdor klublaridan biri – “Valensiya”ni sotib olishga qiziqish bildirmoqda. X ijtimoiy tarmog‘idagi TCR sahifasi tarqatgan ma’lumotga ko‘ra, futbolchi bu xaridni amalga oshirish uchun Saudiya Arabistoni valiahd shahzodasi Muhammad bin Salmon bilan hamkorlikni rejalashtirgan.
Qirollik oilasi vakili ushbu bitimning moliyaviy tomonini nazorat qiladi va Ronalduning rasmiy sherigi bo‘ladi. E’tiborlisi, shahzodaning investitsiya jamg‘armasi Angliyaning “Nyukasl” klubi aksiyalariga ham egalik qiladi.
Ayni paytda “Valensiya” klubi singapurlik biznesmen Peter Lim Eng Hokga tegishli bo‘lib, u jamoani 2014-yilda sotib olgan. Ispaniyaning eng sovrindor klublaridan biri sanalgan “Valensiya” La Liga chempionligini 6 marta, Ispaniya Kubogini esa 8 marta qo‘lga kiritgan. Klub, shuningdek, ikki bor UEFA Chempionlar Ligasi finalida ishtirok etgan.
Hozirgi mavsumda jamoa La Ligada og‘ir vaziyatga tushib qolgan bo‘lib, 25-turdan keyin 18-o‘rinni egallab turibdi. Bu esa jamoaning quyi ligaga tushib ketish xavfini oshirmoqda.
