Boks rasman Olimpiada-2028 dasturiga kiritildi
Bu Xalqaro olimpiya qo‘mitasi sessiyasida maʼqullandi.
Xalqaro olimpiya qo‘mitasi (XOQ) sessiyasi yakdillik bilan boks sportini 2028 yilda Los-Anjelesda o‘tadigan Olimpiya o‘yinlari dasturiga kiritish taklifini maʼqulladi.
Tokio-2020 va Parij-2024 Olimpiadalarida XOQ boks musobaqalarini mustaqil tashkil qilgan edi. Buning sababi Xalqaro boks assotsiatsiyasi (IBA) bilan hakamlik, boshqaruv, moliya va Rossiya bilan aloqalar masalalari bo‘yicha davom etayotgan nizolar edi. XOQ dactlab IBA bilan hamkorlikni to‘xtatgan, 2023 yilda esa uni Olimpiya harakatidan chiqarib tashlagan edi.
Musobaqalarni tashkil etishda yangi hamkor sifatida vaqtinchalik World Boxing tashkiloti tanlandi. Olimpiadaga yo‘llanma olish va unda qatnashish uchun milliy federatsiyalar aynan shu tashkilot aʼzosi bo‘lishi shart.
World Boxing rahbari Boris van der Vorst “TASS” agentligiga bergan intervyusida rossiyalik bokschilarning 2028 yilgi Olimpiadada ishtirok etish imkoniyati muhokama qilinishi mumkinligini maʼlum qildi.
Maʼlumot uchun, Los-Anjeles-2028 Olimpiya o‘yinlari 2028 yilning 14–30 iyul kunlarida bo‘lib o‘tadi.
