“Qamchiq”da mashina yonib ketdi
Unda velosiped va elektroskuterlar bo‘lgan.
Kecha, 11 aprel kuni soat 21:53 da A-373 “Toshkent-O‘sh” avtomobil yo‘lining “Qamchiq” dovoni qismida “CHANGAN” rusumli avtotransport vositasi yukxonasida bo‘lgan elektroskuterning quvvatlagichida yuzaga kelgan qisqa tutashuv natijasida yong‘in kelib chiqqanligi to‘g‘risida yong‘in-qutqaruv boshqarmasiga xabar qilingan.
Shunga ko‘ra 2 ta yong‘in-qutqaruv ekipaji soat 22:09 da voqea joyiga yetib borib, yong‘in soat 22:11 da o‘rab olingan va soat 22:12 da yong‘in to‘liq bartaraf etilgan.
Yong‘in natijasida avtotransport vositasining salon qismi hamda yukxonasi yonib zararlangan. Tezkor harakatlar natijasida yukxonada bo‘lgan 18 ta velosipeddan 9 tasi va 4 ta elektroskuterdan 1 tasi yong‘indan saqlab qolingan.
Hodisa oqibatida tan jarohati olgan va halok bo‘lganlar yo‘q.
