Tramp uchta yirik OAVga Oq uyga kirishni taqiqladi: jurnalistlar sudga murojaat qildi
Donald Tramp taqiqni “soxta yangiliklar”ga qarshi chora sifatida izohladi.
CNN, Politico va MS NOW Oq uy hududiga kirish taqiqlangani sababli AQSh prezidenti Donald Tramp ma’muriyatini sudga berdi. OAV vakillari mazkur qaror matbuot erkinligiga tahdid solayotganini ta’kidlamoqda, deya yozdi Al Jazeera.
Uchala axborot tashkiloti dushanba kuni qo‘shma bayonot berib, jurnalistlarning Oq uyga kirish huquqi hech qanday ogohlantirish yoki tegishli tartib-taomilsiz bekor qilinganini ma’lum qildi. Keyinchalik ularning da’vo arizasi Vashingtondagi federal sudga topshirildi.
OAV vakillarining ta’kidlashicha, hukumat ularning jurnalistik materiallaridan norozi bo‘lgani uchun bunday chorani qo‘llagan. Ular bu holatga qarshilik ko‘rsatilmasa, matbuot erkinligi va jamoatchilikning hukumat aralashuvidan xoli mustaqil axborot olish huquqiga tahdid tug‘ilishini bildirgan.
Shuningdek, AQShning ABC, CBS, CNN, Fox va NBC telekanallari Trampning ayrim tadbirlarini yoritishda qo‘llanadigan navbatma-navbat tasvirga olish (pool) tizimidagi ishtirokini to‘xtatganini ma’lum qildi.
AQSh vitse-prezidenti Jey Di Vens esa OAVlarga nisbatan qo‘llangan cheklovni himoya qildi. Uning so‘zlariga ko‘ra, bu so‘z erkinligiga qarshi qaratilgan chora emas, balki Oq uy ichidagi maxsus kirish imkoniyatini cheklashdir. Vens taqiq “targ‘ibot”ga qarshi qaratilganini aytdi.
Prezident Donald Tramp esa taqiqni “soxta yangiliklar”ga qarshi chora sifatida izohladi. U Truth Social tarmog‘idagi postida bunday axborotni AQSh milliy xavfsizligiga tahdid deb atadi.
Oq uy muxbirlari assotsiatsiyasi Tramp ma’muriyatini CNN, Politico va MS NOW jurnalistlarining Oq uyga kirish imkoniyatini zudlik bilan tiklashga chaqirdi. Tashkilotning ta’kidlashicha, biror OAVni uning yoritish siyosati hukumatga ma’qul kelmagani uchun chetlatish amaliyoti kelajakda boshqa nashrlarga ham qo‘llanishi mumkin.
Ma’lumotlarga ko‘ra, Tramp ma’muriyati avval ham ayrim yirik axborot tashkilotlarining Oq uyga kirishini cheklagan va ma’muriyatga nisbatan xayrixoh deb qaralayotgan yangi media platformalariga ko‘proq imkoniyat bergan.
