Anchelotti “Real”ni tark etadi
U Braziliya jamoasiga o‘tishi mumkin.
Sky Sports xabariga ko‘ra, Karlo Anchelotti 26-aprel kuni bo‘ladigan Ispaniya Kubogi finalidan so‘ng “Real” klubini tark etadi. Uning keyingi manzili Braziliya terma jamoasi bo‘lishi mumkin.
Madridliklar YECHL chorak finalida “Arsenal”ga yutqazib, turnirdan chiqib ketdi. La Ligada esa “Barselona”dan 4 ochko ortda qolmoqda. Shundan so‘ng Anchelotti o‘z lavozimini tark etishi ehtimolini birinchi marta ochiq tilga oldi.
Italyan murabbiy 2013–2015 yillarda “Real”da ishlagan, 2021 yili klubga qaytgan va shu paytgacha 11 ta sovrinni yutgan. Jumladan, 3 marta Chempionlar ligasi, 3 marta UYEFA Superkubogi, ikki marta La Liga, Ispaniya Kubogi va Superkubogini qo‘lga kiritgan.
Braziliya futbol federatsiyasi Anchelottini joriy mavsum tugashidan oldin lavozimga tayinlash niyatida.
