Messi va Suares o'zlarining futbol klubiga asos solishdi
Ular Urugvay futbolini qo‘llab-quvvatlamoqda.
"Inter Mayami" klubi hujumchisi Luis Suares o‘zining yaqin do‘sti va jamoadoshi Lionel Messi bilan birga Urugvayda yangi futbol klubiga asos solganini e’lon qildi. Bu haqda futbolchi "X" ijtimoiy tarmog‘idagi rasmiy sahifasida ma’lum qilgan.
Yangi jamoa "Deportivo LSM" nomi bilan tanilgan bo‘lib, bu qisqartma ikki afsonaviy futbolchining — Luis Suares va Messi nomlaridan tashkil topgan. Klub Urugvay chempionatining to‘rtinchi divizionida ishtirok etadi va yosh futbolchilarni kashf etish, ularni rivojlantirishga katta e’tibor qaratishni rejalashtirmoqda.
"Deportivo LSM" o‘z mashg‘ulotlarini Luis Suaresga tegishli bo‘lgan, zamonaviy infratuzilmaga ega sport majmuasida olib boradi. Majmua tarkibiga 1400 o‘rinli sun’iy qoplamali stadion va 620 o‘rinli mini-futbol maydoni kiradi.
Messi va Suares yangi avlod futbolchilariga ilhom bo‘lishi, ularning orzulariga yo‘l ochishi mumkin bo‘lgan muhim qadamni tashlashdi.
