O‘zbekistonlik talabalar Germaniyaga ishlashga ketib uysiz qolgan
Voqea ish beruvchi bilan kelishmovchiliklar tufayli sodir bo'lgan.
O‘zbekistonning Frankfurt-na-Mayn shahridagi Bosh konsulligi Germaniyaga Work and Travel dasturi bo‘yicha kelgan va og‘ir ahvolga tushib qolgan bir guruh Qoraqalpoq davlat universiteti talabalariga amaliy yordam ko‘rsatdi.
Tashkiliy nosozliklar va ish beruvchi bilan kelishmovchiliklar tufayli 14 nafar talaba vaqtinchalik ish joyiga yetib borolmay, uy-joysiz qolgan. Germaniyada istiqomat qilayotgan vatandoshlar yordami bilan yoshlar Bosh konsullik binosiga olib ketildi.
Diplomatik missiya xodimlari talabalar bilan tushuntirish suhbati o‘tkazdi, ularni mamlakatda bo‘lish qoidalari, shaxsiy xavfsizlik choralari bilan tanishtirdi, shuningdek, hujjatlar va shaxsiy mulkni saqlash muhimligini eslatdi.
Ular vaqtincha mehmonxonaga joylashtirildi. Bundan tashqari, diplomatlar bandlik dasturini muvofiqlashtiruvchi nemis vositachi kompaniyasi vakillari bilan muzokaralar o‘tkazdi. Natijada o‘zbekistonlik yoshlarni rasmiy ishga joylashtirish masalasini imkon qadar tezroq hal etish bo‘yicha kelishuvga erishildi.
