Imtihon sanalari yaqinlashmoqda, nodavlat OTMlar uchun qabul tartibi o‘zgaradi
O‘zbekiston oliy ta’lim tizimida bir qator muhim yangiliklar bo‘lishi kutilmoqda.
Bilim va malakalarni baholash agentligi vakili Jamshid Odilov Hukumat qarori loyihasi haqida ma’lumot berdi.
Uning so‘zlariga ko‘ra, bu yilgi OTMlarga kirish test sinovlari 14–25-iyul oralig‘ida o‘tkazilishi mumkin. Imtihon binolari ro‘yxati shakllantirilgan, ammo aniq sanalar ariza topshirish jarayoni yakunlangach e’lon qilinadi.
Shu bilan birga, oliy ta’lim sohasida nodavlat sektorni yanada rivojlantirish bo‘yicha yangi takliflar ilgari surilmoqda. Hukumatning “Respublikada nodavlat ta’lim xizmatlarining sifatini oshirish chora-tadbirlari to‘g‘risida”gi qaror loyihasi jamoatchilik muhokamasiga qo‘yildi.
Unga ko‘ra, nodavlat oliy ta’lim tashkilotlariga talabalarni yiliga ikki marta — 15-oktyabrgacha va 15-fevralgacha qabul qilish huquqini berish taklif etilmoqda.
Bunga qo‘shimcha ravishda, quyidagi talablar belgilanishi mumkin:
- Nodavlat OTMlarda ham qabul, o‘qishni ko‘chirish va davlat attestatsiyasi jarayonlari davlat OTMlaridagi talablar asosida amalga oshiriladi;
- Ta’lim sifati bo‘yicha nazorat axborot tizimi mavjud bo‘lishi va u vazirlik tizimiga integratsiya qilinishi shart;
- 5 yil ichida zarur infratuzilmaga ega bo‘lishi lozim.
Prezident qarorlari asosida tashkil etilgan oliygohlar esa bu talabdan mustasno hisoblanadi.
Shuningdek, HEMIS tizimida ro‘yxatdan o‘tmagan talabalarga davlat namunasidagi diplomlar berilishiga yo‘l qo‘yilmaydi.
