Messiga Saudiyaning super shartnomasi taklif qilindi
Taklif Ronaldoning Al Nassrga o‘tganidagi shartnoma darajasida.
Saudiya Arabistonining PIF (Public Investment Fund) jamg‘armasi Lionel Messini Inter Miamidan olib chiqib ketish uchun ulkan moliyaviy taklif bilan chiqqani ma’lum bo‘ldi. Bu taklif Cristiano Ronaldoning Al Nassrga o‘tganidagi shartnoma darajasida bo‘lib, imzo puli va yillik maoshni ham o‘z ichiga oladi.
Taklif Messi vakili va otasi Xorxe Messiga rasmiy tarzda taqdim etilgan. Manbalarga ko‘ra, PIF vakillari allaqachon Xorxe Messi bilan muzokaralar olib borgan va ulkan moliyaviy paketni kelishishga harakat qilmoqda.
PIF nazorati ostidagi klublar ichida ayniqsa Al Hilal klubi yetakchi nomzod sifatida ajralib turibdi. 31-may kuni Messi bilan Saudiya tomoni muzokara boshlagani haqida xabarlar chiqqan edi, endi bu harakatlar yana faollashgan.
Hozirda Messi Inter Miamining FIFA Klublar o‘rtasidagi Jahon chempionati ishtirokiga e’tibor qaratgan bo‘lsa-da, Saudiya tomoni uni jalb etish uchun jiddiy urinmoqda.
