O‘zbekistonlik 5 nafar grossmeyster FIDE reytingida top-100 talikdan joy oldi
Reytingda Nodirbek Abdusattorov 7-o‘rinni egallagan.
Xalqaro shaxmat federatsiyasi (FIDE) 2025-yil iyul oyiga mo‘ljallangan yangi reytingini e’lon qildi. Unga ko‘ra, O‘zbekistonlik 5 nafar shaxmatchi dunyoning eng kuchli 100 shaxmatchisi ro‘yxatiga kiritildi.
Eng yuqori natijani Nodirbek Abdusattorov qayd etib, u 2771 reyting ochkosi bilan 7-o‘rinni egalladi. Bu ko‘rsatkich unga kuchli yettilikdan joy olish imkonini berdi.
Reyting peshqadami esa, avvalgidek, norvegiyalik sobiq jahon chempioni Magnus Karlsen bo‘lib, uning hisobida 2839 ball mavjud. Kuchli uchlikdan yana amerikalik Hikaru Nakamura (2807) va Fabiano Caruana (2784) ham joy olgan.
Amaldagi jahon chempioni — hindistonlik Gukesh Dommaraju 2776 ball bilan 6-o‘rinda bormoqda.
O‘zbekistonlik shaxmatchilarning jahon top-100 reytingidagi o‘rinlari quyidagicha:
7-o‘rin — Nodirbek Abdusattorov (2771)
25-o‘rin — Javohir Sindarov (2722)
48-o‘rin — Rustam Qosimjonov (2675)
59-o‘rin — Nodirbek Yoqubboev (2663)
76-o‘rin — Shamsiddin Vohobov (2650)
Bu natijalar O‘zbekiston shaxmat maktabining jahon miqyosida tobora mustahkamlanib borayotganidan dalolat beradi.
