Noma’lum shaxslar avtomobillarni noqonuniy ravishda Tojikistonga olib chiqayotgani fosh etildi
O‘zbekistonda ro‘yxatdan o‘tgan 59 ta avtomobil noqonuniy tarzda sotilgan.
Toshkent shahri hamda Toshkent va Namanagan viloyatlaridagi bojxona idoralari tezkor xodimlari tomonidan olib borilgan maxsus tadbirlar davomida, O‘zbekiston hududida ro‘yxatdan o‘tgan yengil avtomobillarni Tojikistonga olib chiqish va u yerda noqonuniy realizatsiya qilish bilan shug‘ullanib kelgan 8 nafar shaxs faoliyati fosh etildi.
Olib borilgan tekshiruvlarga ko‘ra, ushbu shaxslar “BYD”, “VOLKSWAGEN”, “KAIYI X3”, “HONDA”, “GEOMETRY”, “FAW ID4” va boshqa rusumlardagi jami 59 dona avtomashinalarni har birini 100–200 AQSH dollari evaziga Tojikiston Respublikasiga yetkazib bergan. Avtomobillar keyinchalik qo‘shni mamlakat hududida noqonuniy tarzda sotib yuborilgan.
Mazkur holatlar yuzasidan Davlat bojxona qo‘mitasining Surishtiruv va ma’muriy amaliyot boshqarmasi tomonidan tergovga qadar tekshiruv ishlari boshlab yuborildi. Natijada Jinoyat kodeksining tegishli moddalariga asosan jinoyat ishi qo‘zg‘atilib, materiallar vakolatli tergov organiga topshirildi.
