“Jarima maydonchasi” moduli: Toshkentda jarima maydonchalari bo‘yicha yangi tartib
Qonunchilikni buzganlik uchun ushlangan transport vositalarini vaqtincha saqlash joylariga olib kelish, joylashtirish va saqlash tartibi belgilandi.
Toshkentda qonunchilikni buzganlik uchun ushlangan transport vositalarini vaqtincha saqlash joylariga olib kelish, joylashtirish va saqlash tartibi belgilandi. Bu Hukumatning 22-sentabrdagi 508-son qarori bilan tasdiqlangan nizomda nazarda tutilgan.
Yangi nizom Toshkent shahrida qonunchilik hujjatlarini buzganlik uchun ushlangan transport vositalarini vaqtincha saqlash joylariga olib kelish, joylashtirish va saqlash tartibini belgilaydi.
Unga ko‘ra, vakolatli davlat organi transport vositasini jarima maydonchasiga joylashtirish haqida qaror qabul qilganda, bu haqdagi maʼlumot «Jarima maydonchasi» moduli orqali tegishli davlat organlari va xizmat ko‘rsatuvchi yuridik shaxslarga yuboriladi.
Transport vositasini boshqarishdan chetlashtirish nazarda tutilgan huquqbuzarliklar sodir etilganda, transport faqat maxsus texnika vositalari — evakuator yoki manipulyator yordamida jarima maydonchasiga olib kelinadi.
Ushlangan transportni saqlab turish sabablari bartaraf etilgach, uni jarima maydonchasidan olib chiqishga «Jarima maydonchasi» moduli orqali ruxsat beriladi.
Bunda ruxsatnoma maʼmuriy ishni ko‘rib chiqayotgan organ mansabdor shaxslari tomonidan elektron shaklda rasmiylashtiriladi. Hujjat QR-kod bilan tasdiqlanib, transport vositasi haydovchisi hamda saqlash xizmatini ko‘rsatuvchi yuridik shaxsga modul orqali bir ish kuni ichida yuboriladi. Shuningdek, haydovchining telefon raqamiga SMS-xabarnoma jo‘natiladi.
«Jarima maydonchasi» moduli orqali rasmiylashtirilmagan ruxsatnoma asosida ushlangan transport vositasini jarima maydonchasidan chiqarish taqiqlanadi.
