O‘zbekistonda jazirama boshlanmoqda
Respublikada harorat 45-46 darajagacha ko‘tarilishi mumkin.
“O‘zgidromet” xabariga ko‘ra, 3 iyul kuni O‘zbekiston bo‘ylab havo nihoyatda issiq bo‘ladi. Ayrim hududlarda harorat 46 darajagacha ko‘tarilishi mumkin. Shamol tezligi esa ba’zi joylarda chang-to‘zonlar bilan birga 25 m/s gacha kuchayadi.
Toshkentda havo biroz bulutli bo‘lib, yog‘ingarchilik kutilmaydi. Kechasi harorat 23-25 daraja, kunduzi esa 39-41 daraja issiq bo‘ladi.
Qoraqalpog‘iston va Xorazmda shamol kuchayib, chang-to‘zonlar kuzatilishi mumkin. Kechasi 20-25, kunduzi esa 37-42 daraja atrofida bo‘ladi.
Buxoro va Navoiy viloyatlarida issiq avjida – kunduzi harorat 41-46 darajagacha yetadi. Shamol 18 m/s gacha kuchayib, ayrim joylarda chang-to‘zonlar ko‘tarilishi mumkin.
Sirdaryo, Jizzax, Samarqand va Qashqadaryo viloyatlarida ham kunduzi 43 darajagacha issiq kutilmoqda. Surxondaryoda esa ayrim hududlarda harorat 46 darajaga yetadi.
Andijon, Namangan va Farg‘onada nisbatan salqinroq bo‘lib, harorat 35-40 daraja atrofida bo‘ladi. Tog‘li hududlarda esa kunduzi 28-33 daraja, kechasi 15-20 daraja iliq bo‘ladi.
