Andijonda profilaktika inspektorini pichoqlab o‘ldirgan shaxs topildi
Gumonlanuvchi qabristonda yashirinib yotgan holatda topilgan.
Andijon viloyati Xo‘jaobod tumanida xizmat burchini ado etayotgan vaqtda halok bo‘lgan hudud profilaktika inspektori — katta leytenant Abdurasul Abduvaliyevning o‘limiga sababchi bo‘lgan 65 yoshli Y. Xolbozorov ushlandi. Bu haqda Ichki ishlar vazirligi matbuot xizmati xabar berdi.
Voqea 2025-yil 1-iyul kuni “Yuksalish” mahallasida yuz bergan. Mast holatda o‘z yaqinlariga pichoq bilan tahdid qilayotgan fuqaroga nisbatan chora ko‘rish vaqtida, A. Abduvaliyev ko‘kragiga og‘ir tan jarohati olgan. Shifoxonaga olib ketilayotgan paytda u vafot etgan. Ushbu mudhish voqea jamoatchilik orasida katta rezonans uyg‘otdi.
Gumonlanuvchi Y. Xolbozorov voqeadan so‘ng darhol qochib, qidiruvga berildi. 4-iyul kuni ertalab soat 06:30 larda u “Yuksalish” mahallasidagi “So‘qoloq” qabristonida, makkajo‘xori poyasida yashirinib yotgan holatda topildi. Uni qo‘lga olish jarayonida o‘z joniga suiqasd qilishga uringan — qorin qismiga pichoq bilan jarohat yetkazgan. Tez yordam ko‘rsatilganidan so‘ng u shifoxonaga yotqizilgan.
Hozirda unga nisbatan O‘zbekiston Respublikasi Jinoyat kodeksining 97-moddasi 2-qismi “g” bandi — ya’ni “xizmat yoki fuqarolik burchini bajarayotgan shaxsni qasddan o‘ldirish” moddasi bilan jinoyat ishi qo‘zg‘atilib, tergov harakatlari olib borilmoqda.
Ma’lumot uchun, jinoyat kodeksiga ko‘ra, ushbu moddada nazarda tutilgan jinoyat 15 yildan 25 yilgacha yoki umrbod ozodlikdan mahrum qilish jazosi bilan baholanadi.
Ichki ishlar vazirligi jinoyatchini topish va qo‘lga olishda ko‘mak bergan fuqarolarga minnatdorlik bildirdi.
