Farg‘ona viloyati YHXB boshlig‘i qarindoshining jarimalarini bekor qilgani uchun lavozimidan olindi
Ichki ishlar vazirligi hodisa tafsilotlarini rasman tasdiqladi.
Farg‘onada YHXB boshlig‘i Akmal Ahmedov o‘z lavozimidan ozod etildi. Bu haqda Ichki ishlar vazirligi Yo‘l harakati xavfsizligi bosh boshqarmasi (YHXB) matbuot xizmati ma’lum qildi. Avvalroq ijtimoiy tarmoqlarda viloyat YHXB rahbari yaqin qarindoshiga tegishli bo‘lgan Malibu rusumli avtomobilga oid 106 ta qoidabuzarlik noqonuniy bekor qilingani haqida xabarlar tarqalgan edi.
Mazkur transport vositasi davlat raqami 40 081 SBA bo‘lib, unga tegishli jarimalar tizimdan olib tashlangan. Tekshiruv natijasida avtomobil YHXB boshlig‘ining qarindoshiga tegishli firmaga mansubligi aniqlangan. Hodisa ijtimoiy tarmoqlarda keng muhokamalarga sabab bo‘ldi.
Ichki ishlar vazirligi ushbu holat yuzasidan xizmat tekshiruvini o‘tkazdi. Podpolkovnik Akmal Ahmedov egallab turgan lavozimidan ozod etildi, ish hujjatlari esa huquqni muhofaza qiluvchi organlarga topshirildi. Rasmiylarga ko‘ra, bu korrupsiyaga qarshi qat’iy kurash doirasida amalga oshirilgan chora bo‘ldi.
Shuningdek, haydovchi ilgari bekor qilingan barcha jarimalarni davlat foydasiga to‘liq to‘lagani bildirildi. Tergov ishlari davom etmoqda. Mutasaddilar ushbu kabi holatlarga nisbatan keskin choralar ko‘rilishini ta’kidlashmoqda.
