BMT Assambleyasi “Tolibon”ning inson huquqlarini buzuvchi siyosatini keskin tanqid qildi
O‘zbekiston ham qo‘llab-quvvatlagan BMT rezolyutsiyasida “Tolibon” tomonidan ayollar, qizlar va fuqarolik jamiyatiga nisbatan cheklovlar qoralandi.
Birlashgan Millatlar Tashkiloti Bosh Assambleyasi tomonidan “Tolibon” harakatining inson huquqlariga zid siyosatini keskin tanqid qiluvchi rezolyutsiya qabul qilindi. Hujjatni 116 ta davlat, jumladan, O‘zbekiston ham qo‘llab-quvvatladi. AQSh va Isroil qarshi ovoz bergan bo‘lsa, Rossiya, Xitoy, Hindiston va Eron betaraf pozitsiyada qoldi.
Rezolyutsiya Germaniya, Irlandiya va Shvetsiya tomonidan ilgari surilgan bo‘lib, unda BMT Xavfsizlik Kengashi va Bosh kotibining tavsiyalari, shuningdek, Afgo‘niston bo‘yicha BMT maxsus ma’ruzachisi bergan baholar asos qilib olingan.
Hujjatda “Tolibon” harakati tomonidan:
qiz bolalarning ta’lim olish huquqi cheklangani,
nodavlat tashkilotlar faoliyatiga to‘siqlar yaratilgani,
ayollarning erkin harakatlanishiga qat’iy cheklovlar joriy etilgani kabi amaliyotlar keskin qoralangan.
Shuningdek, rezolyutsiyada xalqaro donorlarni Afgo‘nistondagi og‘ir gumanitar inqirozga, ayniqsa, ayollar va bolalar yuz tutgan muhtojliklarga befarq bo‘lmaslikka va tezkor yordam ko‘rsatishga chaqiruvchi band mavjud.
Mutaxassislar “Tolibon” tomonidan jurnalistlar, huquq himoyachilari va OAV vakillariga nisbatan bosim, senzura va zo‘ravonlik holatlarini ham tanqid qildilar. BMT ushbu harakatni so‘z erkinligi, axborot olish huquqi, xalqaro huquq me’yorlariga amal qilish, noqonuniy hibsga olish, sudsiz jazolash va inson huquqlari buzilishlariga chek qo‘yishga chaqirdi.
Rezolyutsiyada, shuningdek, xalqaro gumanitar tashkilotlar, diplomatlar va tinch aholi xavfsizligini kafolatlash zarurligi ham alohida qayd etilgan.
