Davlat xizmatchilarining malakasini oshirish bo‘yicha yangi tartiblar belgilandi
Tayyorlov va malaka oshirish davlat hamda nodavlat ta’lim tashkilotlari tomonidan olib boriladi.
Prezident Farmoniga asosan, O‘zbekistonda davlat fuqarolik xizmatchilarini qayta tayyorlash va ularning malakasini oshirishga oid aniq talab va mexanizmlar joriy etildi. Endilikda bu jarayonlar xizmatdan ajralgan yoki ajralmagan holda amalga oshiriladi.
Xizmatdan ajralgan holda malaka oshirayotgan davlat xizmatchilarining ish joyi, lavozimi va o‘rtacha ish haqi saqlanadi. Shuningdek, transport, yashash va kunlik xarajatlari ham davlat organlari tomonidan qoplanadi. Bu holat davlat xizmatchilari uchun qulay shart-sharoitlar yaratishga xizmat qiladi.
Tayyorlov va malaka oshirish davlat hamda nodavlat ta’lim tashkilotlari tomonidan olib boriladi. Bu jarayonlar bir necha manbalar, jumladan, davlat byudjeti, xalqaro moliya institutlari grantlari, shuningdek, xizmatchilarning o‘z mablag‘lari hisobidan ham moliyalashtirilishi mumkin.
Oliy ta’lim, fan va innovatsiyalar vazirligi esa davlat organlaridagi fuqarolik xizmatchilarining qayta tayyorlanishi va malaka oshirishiga oid davlat ta’lim talablarini ishlab chiqadi va tasdiqlaydi. Bu esa malaka oshirish tizimini yagona standart asosida olib borishni ta’minlaydi.
