Qozog‘istonda sportchilarga so‘kinish taqiqlanadi
Yangi sport etikasi nizomi sportchilar xulq-atvoriga qatʼiy cheklovlar kiritmoqda.
Qozog‘istonda sportchilarga, murabbiylarga va hakamlarga so‘kinish, diniy eʼtiqodini ochiq namoyish etish va boshqalarni diniy faoliyatga undash taqiqlanadi. Bu haqda 2025 yil 8 iyul kuni eʼlon qilingan Qozog‘iston Respublikasi Turizm va sport vaziri Erbol Mirzabosinovning buyrug‘ida maʼlum qilindi.
Buyruqqa ko‘ra, yangi “Sport etikasi to‘g‘risidagi nizom” sportchilarning odob-axloq meʼyorlarini tartibga soladi. U ikki bo‘limdan iborat bo‘lib, birinchi bo‘limda asosiy tushunchalar — murabbiy, hakam, sport etikasi va boshqalar — izohlanadi. Ikkinchi bo‘lim esa sportchilarning va boshqa ishtirokchilarning xatti-harakatlarini tartibga soluvchi qoidalardan iborat.
Asosiy cheklovlar:
So‘kinish, raqib yoki tashkilotchilarga hurmatsizlik;
Diniy ramzlarni ochiq namoyish etish va missionerlik faoliyati bilan shug‘ullanish;
Treninglar yoki musobaqalar haqidagi maxfiy maʼlumotlarni oshkor qilish;
Spirtli ichimlik isteʼmoli yoki ijtimoiy axloqqa zid harakatlar;
Siyosiy chiqishlar, kamsitish yoki tahdidlar.
Shuningdek, sportchilardan davlat madhiyasi chog‘ida axloqiy tartibga rioya qilish, hakamlar bilan tortishmaslik, ommaviy axborot vositalari bilan hurmat asosida muloqotda bo‘lish va ijobiy namunali xulq ko‘rsatish talab etiladi.
Hujjat rasmiy ravishda eʼlon qilinganidan 10 kun o‘tib kuchga kiradi.
