Toshkentda “prava” olib bermoqchi bo‘lgan inspektor qo‘lga olindi
Inspektor 1500 dollar va imtihon uchun 1,9 mln so‘m olayotgan vaqtda DXX va prokuratura tomonidan ushlangan.
Toshkent shahar IIBB Jamoat tartibini saqlash boshqarmasining patrul-post xizmati inspektori xizmat mavqeyini suiiste’mol qilib, fuqaroning ishonchiga kirgan va Navoi viloyatida yashovchi tanishiga haydovchilik guvohnomasini olib berishini va’da qilgan. Bu haqda Zamon.uz'ga DXX xabar qildi.
Davlat xavfsizlik xizmati Toshkent shahar boshqarmasi va Bosh prokuratura huzuridagi Departament xodimlari tomonidan Yunusobod tumanida o‘tkazilgan tezkor tadbirda inspektor 1500 AQSh dollari va imtihon uchun to‘lanishi lozim bo‘lgan 1 million 900 ming so‘mni olayotgan vaqtda qo‘lga olingan. Pul mablag‘lari ashyoviy dalil sifatida rasmiylashtirilgan.
Mazkur holat yuzasidan unga nisbatan Jinoyat kodeksining 168-moddasi (firibgarlik) va 211-moddasi (pora olish) bilan jinoyat ishi qo‘zg‘atilib, qamoq ehtiyot chorasi qo‘llanildi.
Hozirda tergov harakatlari olib borilmoqda.
