Ko‘kdaladagi “zapravka”da sodir bo‘lgan portlash bo‘yicha jinoyat ishi ochildi
So‘nggi maʼlumotlarga ko‘ra, portlashda 4 kishi vafot etgan, yana 20 dan ortiq odam shifoxonada.
Ko'kdala tumanida sodir bo‘lgan yong‘in yuzasidan Jinoyat kodeksining 205-moddasi (hokimiyat yoki mansab vakolatini suiiste’mol qilish) va 259-moddasi (yong‘in xavfsizligi qoidalarini buzish) bo‘yicha jinoyat ishi qo‘zg‘atildi. Ichki ishlar organlari hodisa sabablarini aniqlash va mas’ullarni javobgarlikka tortish bo‘yicha ish olib bormoqda.
Hozirda tegishli mutaxassislar tomonidan yong‘in ko‘lamini va yetkazilgan zarar miqdorini aniqlash ishlari amalga oshirilmoqda. Shu maqsadda bir nechta maxsus ekspertizalar – sud-tibbiy, sud-kimyoviy, biologik, kriminalistik hamda yong‘in-texnik tekshiruvlari tayinlangan.
Ayni paytda tergov harakatlari davom etmoqda. Hodisa yuzasidan qo‘shimcha ma’lumotlar rasmiy manbalar orqali e’lon qilinadi.
