O‘zbekiston Koreyaga yana 6 bosh xizmat itini eksport qildi
Milliy Kinologiya Markazi tayyorlagan itlar endi Janubiy Koreya bojxona xizmatida xizmat qiladi.
O‘zbekiston va Janubiy Koreya o‘rtasida bojxona sohasidagi hamkorlik yildan-yilga kengayib bormoqda. Xususan, ikki davlat bojxona xizmatlari o‘rtasidagi kinologiya sohasidagi hamkorlik amaliy natijalar bermoqda.
So‘nggi kelishuvlar doirasida Toshkentdagi Milliy Kinologiya Markazi tomonidan “giyohvand vositalarni qidirish” yo‘nalishida tayyorlangan navbatdagi xizmat itlari Janubiy Koreya bojxona xizmatiga topshirildi.
2023–2024-yillarda Milliy Kinologiya Markazida tayyorlanib, Koreya bojxona xizmatiga yuborilgan 6 bosh labrador zoti xizmat iti ayni paytda xalqaro aeroportlar va dengiz portlarida samarali faoliyat olib bormoqda.
Shu sababli, 2024-yil iyun oyida koreyalik mutaxassislar Toshkentga tashrif buyurib, yana 6 bosh xizmat itini xarid qilish bo‘yicha ikki tomonlama shartnoma imzolashdi.
Ushbu shartnoma doirasida, yaqinda Toshkent xalqaro aeroporti orqali 6 bosh xizmat iti Koreyaga jo‘natildi. Barcha itlar zaruriy veterinar ko‘riklardan muvaffaqiyatli o‘tib, xalqaro tashish uchun hujjatlari rasmiylashtirildi va “Eksport uch qadamda” tizimi orqali bojxona deklaratsiyasi asosida Koreyaga eksport qilindi.
Koreya bojxona xizmati vakillari tomonidan qabul qilib olingan xizmat itlari — Jessie, Bella, Farona, Rada, Fayz va Fariz — endilikda iqlimga moslashish jarayonini yakunlab, xizmatga safarbar qilinishi kutilmoqda.
Ma'lumot uchun, hozirgacha Milliy Kinologiya Markazi tomonidan tayyorlanib Koreyaga yuborilgan xizmat itlari soni 12 taga yetdi.
