Saida Mirziyoyeva Xitoy parlamenti raisi bilan uchrashdi
Uchrashuvda transport, savdo, ta’lim va madaniyat sohalaridagi qo‘shma loyihalarni amalga oshirish masalalari ko‘rib chiqildi.
O‘zbekiston Prezidenti Administratsiyasi rahbari Saida Mirziyoyeva Xitoy Kommunistik partiyasi Markaziy Qo‘mitasi Siyosiy byurosi Doimiy qo‘mitasi a’zosi, Butunxitoy xalq vakillari kengashi Doimiy qo‘mitasi raisi Chjao Letszi bilan uchrashdi.
Muloqotda O‘zbekiston va Xitoy o‘rtasidagi strategik munosabatlarning izchil rivojlanishi, shuningdek, parlamentlararo aloqalarning yangi bosqichga ko‘tarilayotgani muhokama qilindi.
Suhbat davomida ikki davlat rahbarlarining izchil va samarali muloqoti natijasida so‘nggi yillarda O‘zbekiston-Xitoy munosabatlari mustahkamlanib, hamkorlikning yangi yo‘nalishlari bilan boyib borayotgani qayd etildi.
Saida Mirziyoyeva Xitoy tomonining O‘zbekistonni qo‘llab-quvvatlashi, xususan, transport, savdo, ta’lim va madaniyat sohalaridagi aniq loyihalarni birgalikda amalga oshirishga qaratilgan tashabbuslarini yuqori baholadi.
Uchrashuvda ikki tomonlama hamkorlikni yanada kengaytirish, mavjud kelishuvlarni izchil hayotga tatbiq etish hamda istiqboldagi mushtarak rejalarni amalga oshirish masalalariga alohida e’tibor qaratildi.
Saida Mirziyoyeva Chjao Letsziga ochiq va mazmunli muloqot uchun minnatdorlik bildirdi.
