“Mubashshir Ahmad”ga nisbatan jinoyat ishi sudga oshirildi
Tursunovga Isroil-G‘azo bo‘yicha bildirgan ijtimoiy tarmoqdagi fikrlari uchun ham ayblov qo‘shilgan.
“Mubashshir Ahmad” taxallusi bilan tanilgan Aʼlisher Tursunovga nisbatan qoʻzgʻatilgan jinoyat ishi yakuniga yetkazilib, tegishli sudga oshirildi. Bu haqda uning advokati Ruslan Sodiqov o‘zining Facebook sahifasida ma’lum qilgan.
Rasmiy ma’lumotlarga ko‘ra, A.Tursunov Jinoyat kodeksining 244⁻3-moddasi — “Diniy ekstremizm va aqidaparastlik g‘oyalarini targ‘ib etuvchi materiallarni tayyorlash, saqlash va ommaviy axborot vositalari orqali tarqatish” bilan ayblanmoqda.
Advokatning ta’kidlashicha, Tursunovga qo‘yilgan ayblovlar qatoriga uning ijtimoiy tarmoqlarda Isroil–G‘azo mojarosi bo‘yicha bildirgan fikrlari ham kiritilgan.
Jinoyat ishi dastlab 2023-yil 11-avgust kuni Toshkent shahri Shayxontohur tumani IIB huzuridagi tergov bo‘limi tomonidan qo‘zg‘atilgan. Tergov davomida unga diniy mazmundagi materiallarni qonunchilikka xilof tarzda tarqatganlik gumoni qo‘yilgan.
Hozirda jinoyat ishi sud muhokamasiga tayyorlanmoqda. Sud majlisi sanasi va boshqa tafsilotlar hozircha oshkor etilmagan.
