“A.U.Y.”: Jinoyatni targ‘ib qiluvchi tuzilma yoshlar orasida yoyilmoqda
DXX “A.U.Y.” deb ataluvchi Rossiyada taqiqlangan jinoyatchilik harakatining yoshlar va mehnat migrantlari orasida tarqalayotganidan ogohlantirib, uning og‘ir huquqiy oqibatlariga e’tibor qaratmoqda.
O‘zbekiston Respublikasi Davlat xavfsizlik xizmati fuqarolar, xususan, yoshlar va xorijda vaqtincha mehnat faoliyati bilan band bo‘lgan shaxslarni “A.U.Y.” deb ataluvchi jinoyatga undovchi guruhlarning tahdidi borasida jiddiy ogohlantiradi.
Mazkur harakat ilk bor Rossiya Federatsiyasida shakllangan bo‘lib, u yerda “mahbuslar qonun-qoidalari”ni targ‘ib qiladi va jamiyatga jinoyatchilik mafkurasini singdirishga urinadi. Rossiya hukumati tomonidan 2020-yilda ekstremistik tashkilot deb topilgan va taqiqlangan bu tuzilma bilan bog‘liq har qanday faoliyat uchun jinoiy javobgarlik belgilangan.
Afsuski, ushbu zararli mafkura bugungi kunda ayrim o‘zbekistonlik yoshlar orasida, ayniqsa Rossiyada ishlayotgan mehnat migrantlari orasida ham tarqalmoqda. So‘nggi yillarda bir nechta yurtdoshlarimiz mazkur harakatga aloqadorligi uchun jazoga tortilgan.
Bu tuzilma asosan ijtimoiy tarmoqlar, messenjerlar va video platformalar orqali yoshlar ongiga ta’sir o‘tkazishga harakat qilmoqda. “Zakon po ponyatiyam”, “bratva”, “sovet” kabi atamalar orqali jinoyatchilik mafkurasini ommalashtirish, “do‘stona guruh” ko‘rinishida e’tiborni jalb qilish — ushbu harakatning asosiy usullaridan biridir. Biroq bunday “guruhlar” bilan aloqaga kirishish fuqaroni bevosita jinoiy faoliyatga jalb qilishi mumkin.
Rossiya qonunchiligiga ko‘ra, “A.U.E.” faoliyatida ishtirok etish yoki uni targ‘ib qilish quyidagi jazolar bilan yakunlanishi mumkin:
300 mingdan 600 ming rublgacha jarima;
1 yildan 6 yilgacha ozodlikdan mahrum qilish;
1 yildan 4 yilgacha majburiy mehnatga jalb etish.
Bu nafaqat shaxsning erkinligini, balki uning huquqiy maqomi, ish o‘rni, yashash huquqi va oilasi kelajagini xavf ostiga qo‘yadi.
