Yangi o‘quv yilida 738 ming bola 1-sinfga chiqadi, hozirgacha 600 ming bola qabul qilingan
Bu yil 2018-yil 31-dekabriga qadar tug‘ilgan bolalar maktabga qabul qilinadi, jarayon esa 15-avgustgacha davom etadi.
O‘zbekistonda 2025/2026-o‘quv yilida 738 ming nafar bola ilk bor maktab ostonasini hatlaydi. Maktabgacha va maktab ta’limi vazirligi ma’lumotiga ko‘ra, hozirga qadar qariyb 600 ming bola 1-sinfga qabul qilindi, jarayon esa 15-avgustgacha davom etadi. “Ta’lim to‘g‘risida”gi qonunga muvofiq, bu yil 2018-yil 31-dekabriga qadar tug‘ilgan bolalar maktabga qabul qilinadi.
Yangi o‘quv yilida 1-sinfga qadam qo‘yayotgan har bir bola Prezident sovg‘asi sifatida 12 nomdagi o‘quv qurollarini oladi. Ular orasida o‘quv sumkasi, daftarlar, ruchka, qalamlar, rangli qog‘oz, plastilin, rasm daftari, o‘chirg‘ich, akvarel bo‘yoqlar, yelim va qalamdon mavjud. Bu to‘plamlar “Ta’lim-ta’minot va logistika” xizmati orqali hududlarga 1–10-avgust, maktablarga esa 10–20-avgust kunlari yetkaziladi.
Vazirlik ma’lumotlariga ko‘ra, 2025/2026-o‘quv yilida mamlakat bo‘ylab 10 170 dan ortiq umumta’lim maktabida 6,7 million nafar o‘quvchi ta’lim oladi. Yangi o‘quv yili arafasida 30 dan ortiq yangi maktab foydalanishga topshiriladi. Bundan tashqari, ijtimoiy va ishlab chiqarish dasturlari hamda boshqa manbalar hisobidan 379 ta maktabda qurilish va ta’mirlash ishlari olib borilmoqda, natijada 112 mingga yaqin yangi o‘quvchi o‘rinlari yaratiladi.
Shuningdek, vazirlik ta’lim sifati past bo‘lgan 470 ta maktab ro‘yxatini tasdiqladi. Bu kabi maktablarning eng ko‘pi Qashqadaryo viloyatida — 99 ta. Mutaxassislar bunday muassasalarda ta’lim sifatini oshirish bo‘yicha alohida dasturlar ishlab chiqilishini ta’kidlamoqda.
