JCh-2025: O‘zbekiston bokschilari 9 jangda 9 ta g‘alaba qozondi
Liverpoolda o‘tayotgan jahon chempionatida ringga chiqqan barcha o‘zbekistonlik bokschilar o‘z raqiblarini mag‘lub etib, milliy terma jamoamizning mag‘lubiyatsiz seriyasini davom ettirdi.
Angliyaning Liverpool shahrida boks bo‘yicha Jahon chempionati qizg‘in pallaga kirib bormoqda. Musobaqaning 9-sentabr kungi janglarida o‘zbekistonlik bokschilar yuqori natija ko‘rsatib, xalqaro ringda navbatdagi muvaffaqiyatlarni qo‘lga kiritishdi.
Kun davomida ringga chiqqan 9 nafar vakilimizning barchasi o‘z raqiblarini ishonchli tarzda mag‘lub etdi. Natijada O‘zbekiston terma jamoasi musobaqada mag‘lubiyatsiz yurishini davom ettirmoqda. Bunday seriya sportchilarimizning tayyorgarligi va jismoniy hamda ruhiy barqarorligini yana bir bor isbotladi.
1/8 final bosqichida Feruza Kazakova (−51 kg) braziliyalik Karoline De Almeydani, Sitora Turdibekova (−60 kg) italiyalik Rebekka Nikolini, Mirazizbek Mirzahalilov (−55 kg) eronlik Mahdiy Kozimiyni, Javohir Ummataliev (−80 kg) koreyalik Kim Min Seongni, Sabina Boboqulova (−48 kg) polshalik Angelika Kristoforskani, Shodiyorjon Meliquziyev (−50 kg) avstraliyalik Omer Izazni, Asadxuja Mo‘ydinxo‘jayev (−65 kg) finlyandiyalik Ismoil Umarni va Akmaljon Isroilov (−85 kg) avstraliyalik Lachlan Lousonni yengishdi.
Shuningdek, chorak finalda ringga chiqqan Aziza Zokirova (−70 kg) Germaniya vakili Leonie Myullerni ortda qoldirib, keyingi bosqichga yo‘l oldi. Shu tariqa, o‘zbekistonlik bokschilar 9 jangda 9 g‘alaba bilan xalqaro musobaqada milliy sportimiz qudratini yana bir bor namoyon qilishdi.
