JCH: O‘zbekistonlik 5 bokschi finalga chiqdi
Yana olti nafar bokschimiz yarim final janglarida ringga chiqishi kutilmoqda.
Buyuk Britaniyaning Liverpul shahrida World Boxing tashkiloti tomonidan o‘tkazilayotgan kattalar o‘rtasidagi Jahon chempionati qizg‘in davom etmoqda. 12-sentabr kuni yarim final bahslarida ishtirok etgan barcha o‘zbekistonlik bokschilar final yo‘llanmasini qo‘lga kiritdi.
Musobaqaning 1/2 final bosqichida -65 kg vazn toifasida Navbahor Hamidova Xitoy Taypeyi vakili Chen Nien-Chinni 3:2 hisobida mag‘lub etdi. 60 kg vazn toifasida Abdumalik Xalokov yaponiyalik Shunsuke Kitamotoni 5:0 hisobida yengdi.
Shuningdek, 75 kg vazn toifasida Fazliddin Erkinboev ozarbayjonlik Saidjamshid Jafarov ustidan 4:1 hisobida g‘alaba qozondi. 90 kg vaznda To‘rabek Habibullaev ispaniyalik Enmanuel Rees Plani 4:1 hisobida ortda qoldirdi. +90 kg vazn toifasida esa Jahongir Zokirov xitoylik Danabieke Bayikevuzeni 5:0 hisobida mag‘lub etib, finalga yo‘l oldi.
O‘zbekiston delegatsiyasi besh nafar finalchiga ega bo‘ldi. Qolaversa, yana olti nafar bokschimiz yarim final janglarida ringga chiqishi kutilmoqda.
