Oksford universitetida o‘zbek tilini o‘rganish loyihalari yo‘lga qo‘yilishi rejalashtirilmoqda
Saida Mirziyoyeva Buyuk Britaniya Adliya vaziri bilan ta’lim sohasidagi hamkorlikni muhokama qildi.
Prezident Administratsiyasi rahbari Saida Mirziyoyeva 15-oktyabr kuni Buyuk Britaniya Bosh vaziri o‘rinbosari, Adliya vaziri Devid Lemmi bilan uchrashuv o‘tkazdi.
Suhbat chog‘ida O‘zbekiston va Buyuk Britaniya o‘rtasidagi ta’lim va madaniy hamkorlikni kengaytirish masalalari muhokama qilindi. Xususan, O‘zbekiston maktablarida Kembrij ta’lim dasturlarining ayrim yo‘nalishlarini joriy etish, ingliz tilida so‘zlashuvchi malakali o‘qituvchilarni jalb qilish hamda Oksford universitetida o‘zbek tilini o‘rganish bo‘yicha qo‘shma loyihalarni yo‘lga qo‘yish istiqbollari ko‘rib chiqildi.
Uchrashuvda inson kapitalini rivojlantirish, yoshlar uchun zamonaviy bilim olish imkoniyatlarini kengaytirish va ikki mamlakat o‘rtasidagi ilmiy-ma’rifiy aloqalarni yanada mustahkamlash masalalariga alohida e’tibor qaratildi.
Saida Mirziyoyeva bunday tashabbuslar O‘zbekiston va Buyuk Britaniya xalqlari o‘rtasidagi o‘zaro ishonch va do‘stlik rishtalarini yanada mustahkamlashda muhim o‘rin tutishini ta’kidladi.
