Samarqandda MDH davlatlari xavfsizlik va razvedka xizmatlari rahbarlarining 21-majlisi o‘tkaziladi
Majlisda Ozarbayjon, Belarus, Qozog‘iston, Rossiya va boshqa davlatlar vakillari qatnashadi. Uchrashuvga DXX rahbari Bahodir Qurbonov raislik qiladi.
Samarqand shahrida MDHga a’zo davlatlar xavfsizlik organlari va razvedka xizmatlari rahbarlarining 21-majlisi o‘tkaziladi
Joriy yilning 17-oktabr kuni Samarqand shahrida Mustaqil Davlatlar Hamdo‘stligiga a’zo davlatlar xavfsizlik organlari va razvedka xizmatlari rahbarlarining 21-majlisi o‘z ishini boshlaydi.
Mamlakatimizda ilk bor o‘tkazilayotgan ushbu tadbirda Ozarbayjon, Armaniston, Belarus, Qozog‘iston, Qirg‘iziston, Rossiya, Tojikiston, Turkmaniston va O‘zbekistonning xavfsizlik organlari hamda razvedka xizmatlari rahbarlari ishtirok etadi.
Uchrashuvga O‘zbekiston Respublikasi Davlat xavfsizlik xizmati rahbari general-polkovnik B. Qurbonov raislik qiladi.
Tadbirda ishtirokchilar zamonaviy xavf va tahdidlar yuzasidan fikr almashib, MDH davlatlari razvedka xizmatlari o‘rtasidagi hamkorlikni mustahkamlash bo‘yicha galdagi vazifalarni muhokama qiladilar.
Tadbir o‘tkaziladigan joy va kun tartibi 2024-yil 26-noyabr kuni Moskva shahrida bo‘lib o‘tgan 20-yubiley majlisda belgilab olingan edi.
Uchrashuv yakunida delegatsiyalar rahbarlari mintaqaviy xavfsizlikni ta’minlash bo‘yicha hamkorlikning aniq vazifalari va ustuvor yo‘nalishlarini belgilab oladilar.
