Rossiyada hibsga olingan o‘zbekistonlik ayol va farzandi vatanga qaytarildi
Ayol immigratsiya qonunchiligini buzganlikda gumonlanib qo'lga olingan.
Oʻzbekiston Bosh konsulligi diplomatlari tomonidan xorijda og‘ir ahvolda qolgan vatandoshlarni qaytarish bo‘yicha navbatdagi amaliy choralar ko‘rildi. Bu haqda Dunyo axborot agentligi xabar berdi.
Ma’lum qilinishicha, yosh ona Rossiya hududida immigratsiya qonunchiligini buzganlikda gumon qilinib, Novosibirsk shahrida huquqni muhofaza qiluvchi organlar tomonidan hibsga olingan va chet el fuqarolarini vaqtincha saqlash markaziga joylashtirilgan.
Uning voyaga yetmagan farzandi esa bu vaqtda shahardagi “Oila” ijtimoiy yordam markazida saqlangan va Bosh konsulning shaxsiy nazoratida bo‘lgan.
O‘zbekiston diplomatlarining tezkor choralar ko‘rishi natijasida bola uchun barcha zarur hujjatlar rasmiylashtirildi va ona-farzand 17-fevral kuni O‘zbekistonga qaytarildi.
