Ko‘ksaroy qarorgohida Prezident Shavkat Mirziyoyevning yoshlar bilan ochiq muloqoti boshlandi
Uchrashuvda Qoraqalpog‘iston, barcha viloyatlar va Toshkent shahridagi studiyalar orqali 60 mingdan ziyod yoshlar vakillari ishtirok etmoqda.
“Ko‘ksaroy” qarorgohida O‘zbekiston Prezidenti Shavkat Mirziyoyevning yoshlar bilan ochiq muloqoti boshlandi. Mazkur uchrashuvda Qoraqalpog‘iston Respublikasi, viloyatlar hamda Toshkent shahridagi studiyalar orqali 60 mingdan ziyod yoshlar vakillari ishtirok etmoqda.
Ta’kidlanganidek, mamlakatda yoshlar uchun yaratilgan keng imkoniyatlar natijasida so‘nggi yillarda o‘g‘il-qizlar jahon fan olimpiadalarida yuksak natijalarga erishib, 66 ta oltin, 147 ta kumush va 221 ta bronza medalni qo‘lga kiritdi.
Bugungi kunda iqtidorli yoshlar dunyoning eng nufuzli oliy ta’lim muassasalari, jumladan Harvard University, Yale University, Princeton University, Columbia University va Cornell Universityda tahsil olmoqda. Ushbu nufuzli oliygohlarda o‘qiyotgan yoshlar soni 500 nafardan oshgan bo‘lsa, TOP-100 talikka kiruvchi universitetlarda ta’lim olayotgan o‘zbekistonlik talabalar soni 3,5 ming nafardan ortdi.
Shuningdek, yangilikka intiluvchan yoshlar tomonidan yaratilgan 63 ta startap loyihasi AQSh, Janubiy Koreya, Buyuk Britaniya va Birlashgan Arab Amirliklari bozorlariga muvaffaqiyatli kirib bordi.
Yosh sportchilar ham xalqaro arenalarda yurt sha’nini munosib himoya qilib, 720 ta oltin, 671 ta kumush va 854 ta bronza medallarni qo‘lga kiritdi. Bugungi kunda yosh tadbirkorlar mamlakatdagi biznes vakillarining qariyb 35 foizini tashkil etmoqda.
