O‘zbekistonda ekologik huquqbuzarliklar uchun javobgarlik kuchaytiriladi
Yangi qonunga ko‘ra, ekologik qoidabuzarliklar uchun jarimalar oshiriladi va yuridik shaxslarga moliyaviy sanksiyalar joriy etiladi.
Oliy Majlis Senati atrof-muhitni muhofaza qilish va tabiatdan foydalanish sohasidagi huquqbuzarliklar uchun javobgarlikni kuchaytirishga qaratilgan qonunni ma’qulladi. Bu haqda parlament yuqori palatasi matbuot xizmati ma’lum qildi.
Qonun bilan ekologiya va atrof-muhitni muhofaza qilish sohasida sodir etiladigan qoidabuzarliklarning oldini olish hamda javobgarlik choralarini kuchaytirishga qaratilgan bir qator o‘zgartish va qo‘shimchalar kiritilmoqda.
Yalpi majlisda ta’kidlanishicha, amaldagi tartibga ko‘ra Ma’muriy javobgarlik to‘g‘risidagi kodeksida nazarda tutilgan ayrim ekologik huquqbuzarliklar uchun jarimalar miqdori past bo‘lib, ular yetarli darajada ogohlantiruvchi va profilaktik ta’sir ko‘rsatmayapti.
Shuningdek, mansabdor shaxslarga nisbatan qo‘llanilayotgan jarimalar ayrim hollarda tadbirkorlik subyektlariga sezilarli moliyaviy ta’sir ko‘rsatmayotgani, bu esa mulkdorlar orasida “jazosizlik hissi” paydo bo‘lishiga olib kelayotgani qayd etildi. Shu sababli ekologiya, atrof-muhitni muhofaza qilish va tabiiy resurslardan foydalanish sohasidagi qoidabuzarliklar uchun jazolarni kuchaytirish zarurligi ta’kidlandi.
Qonunga muvofiq, Atrof‑muhitni muhofaza qilish to‘g‘risidagi qonunga yuridik shaxslarga nisbatan moliyaviy sanksiyalarni belgilovchi yangi bob kiritilmoqda. Mazkur normalar ekologik talablarni buzgan tashkilotlarga nisbatan qat’iy choralar ko‘rishga xizmat qiladi.
Bundan tashqari, kodeksning 88-moddasiga ham o‘zgartirishlar kiritilmoqda. Unga ko‘ra, atmosfera havosini muhofaza qilish talablarini buzgan holda shinalar, bitum, yoqilg‘i moyi, plyonka, sintetik materiallar, rezina, jun tolasi hamda turli chiqindilarni maxsus mo‘ljallanmagan joylarda yoqish uchun ma’muriy javobgarlik belgilanishi nazarda tutilmoqda.
Qayd etilishicha, yangi tartib ekologik huquqbuzarliklarning oldini olish, atrof-muhitni muhofaza qilish tizimini mustahkamlash hamda tabiatdan oqilona foydalanishni ta’minlashga xizmat qiladi.
