Shavkat Mirziyoyev maktablarda sport to‘garaklarining “nomiga” tashkil etilayotganini tanqid qildi
Prezident raisligida jismoniy tarbiya va sport sohasidagi kelgusidagi ustuvor vazifalarga bag‘ishlangan videoselektor yig‘ilishi boshlandi.
Prezident Shavkat Mirziyoyev raisligidagi videoselektor yig‘ilishida jismoniy tarbiya va sport sohasidagi mavjud muammolar tanqid qilindi.
Yig‘ilish avvalida davlat rahbari sportning nafaqat musobaqa, balki sog‘lom turmush tarzi, intizom, vatanparvarlik va mamlakat nufuzini namoyon etuvchi muhim omil ekanini ta’kidladi.
Qayd etilishicha, so‘nggi to‘qqiz yilda 1,5 mingdan ortiq mahallada 1 ming 774 ta zamonaviy sport maydonchasi barpo etilgan. Hududlarda 200 dan ziyod yirik sport inshootlari va qariyb 4 ming xususiy sport klublari faoliyat boshlagan. Professional sport bilan shug‘ullanuvchi yoshlar soni 2 barobarga oshgan, olimpiya terma jamoalari sportchilari 2 barobar, paralimpiya yo‘nalishida esa 3 barobar ko‘paygan.
Birgina o‘tgan yilning o‘zida sportchilar xalqaro musobaqalarda 452 ta oltin, 418 ta kumush va 501 ta bronza medalni qo‘lga kiritgani, 50 nafardan ortiq sportchi jahon va Osiyo rekordlarini yangilagani ta’kidlandi.
Shu bilan birga, tizimdagi muammolar ham tanqid qilindi. Xususan, maktablarda sport to‘garaklarini tashkil etish va murabbiylarni mahallalarga jalb qilish ishlari yetarli darajada emasligi ko‘rsatib o‘tildi.
Masalan, Toshkent shahridagi 15 ta maktabda to‘garaklar “nomiga” tashkil etilib, ularga atigi 3–4 nafar bola qatnayotgani aniqlangan. Shuningdek, o‘tgan yili Jizzax, Qashqadaryo va Farg‘ona viloyatlarida maktab o‘quvchilarining to‘rtdan biri jismoniy tayyorgarlik bo‘yicha minimal talablarni bajara olmagan.
Yig‘ilishda hokimlar oldiga har bir maktabda sport to‘garaklari uchun sharoit yaratish va qamrovni oshirish vazifasi qo‘yildi.
Sport maktablari faoliyatida ham kamchiliklar qayd etildi. Ularning iqtidorli yoshlarni mahallama-mahalla aniqlash o‘rniga tayyor sportchilar bilan ishlayotgani tanqid qilindi.
Jumladan, Samarqand viloyatida mavjud imkoniyatlar hisobiga 100 ming nafar yoshni professional sportga jalb etish mumkin bo‘lsa-da, amalda bu ko‘rsatkich 3 barobar kamligi qayd etildi. Navoiy va Surxondaryo viloyatlarida ham mavjud salohiyatning faqat yarmi ishga solinayotgani bildirildi.
Bundan tashqari, ixtisoslashgan sport maktablarining oddiy sport maktablaridan farqi sezilmayotgani e’tirozga sabab bo‘ldi. Misol sifatida, Termiz shahridagi 4 ta ixtisoslashgan sport maktabi natijalari Jarqo‘rg‘ondagi bitta sport maktabi darajasiga ham yetmayotgani keltirildi. Jarqo‘rg‘on sport maktabi o‘tgan yili Osiyo va jahon chempionatlarida 6 ta medal qo‘lga kiritgan bo‘lsa, viloyatdagi 4 ta ixtisoslashgan maktab jami 1 ta medal bilan cheklangan.
Prezident har bir ixtisoslashgan sport maktabi direktori va murabbiylari ish uslubini o‘zgartirishi, aniq natijalarga yo‘naltirilgan tizim joriy etilishi zarurligini ta’kidladi. Ularning oylik maoshi o‘quvchilar natijasiga bog‘lanishi lozimligi qayd etildi.
Mutasaddilarga yuqori natijalarga erishgan sport maktablarini rag‘batlantirish tizimini kuchaytirish, amaldagi mukofotlarga qo‘shimcha ravishda yana 500 million so‘mdan alohida mukofot ajratish topshirildi.
