Qashqadaryoda cho‘kayotgan bolani qutqargan FVV xodimi "A’lo xizmatlari uchun" ko‘krak nishoni bilan taqdirlandi

Qashqadaryo viloyati Kitob tumanida daryoga cho‘kayotgan 9 yoshli bolani qutqarib qolgan FVV xodimi, mayor Husniddin Sharapov favqulodda vaziyatlar vaziri tomonidan “A’lo xizmatlari uchun” ko‘krak nishoni bilan taqdirlandi. Bu haqda FVV xabar qildi.

 

Hodisa haqida gapirgan Husniddin Sharapovning aytishicha, u ishdan kelib uyiga kirgan vaqtda katta o‘g‘li daryoda bola cho‘kayotganini aytgan.

 

«Katta o‘g‘lim yugurib kelib, “Dada, choping, daryoga bola cho‘kib ketyapti”, dedi. Shu zahoti yugurib ketdim. Yo‘ldan biror narsa sindirib oldim, tortib olaman deb», — dedi u.

 

"Har bir erkak ham mening o‘rnimda bo‘lsa, shu ishni qilardi. Kelajagi nima bo‘lishidan qat’i nazar… Shu yugurib keldim”, — deydi FVV xodimi.

 

Sharapovning so‘zlariga ko‘ra, voqea joyiga yetib kelganida ikki nafar bola “ukam cho‘kib ketdi” deb baqirayotgan bo‘lgan. U avval velosipedni suvga tashlab, bolani ushlab qolishga uringan. Biroq bola qattiq qo‘rqib qolgani sababli uni tutib olish imkoni bo‘lmagan.

 

Shundan keyin FVV xodimi o‘zi suvga tushib, bolani tortib chiqqan. Qayd etilishicha, bola vahima sabab qutqaruvchini suvga bosgan. Shu vaqtda Sharapovning akasi va qo‘shnisi yordamga kelgan.

 

"Avval bolani chiqarib yubordim. Keyin qishloq ahlini ogohlantirish maqsadida “bolalaringizga qaranglar” degan ma’noda video murojaat ham qildim. Bolaning kimligini bilmasdim. Keyin surishtirib, shu qishloqdan ekanini bildim. Uni uyiga olib borib, issiq suv ichirdik, yuvintirdik va adyolga o‘rab, ota-onasiga topshirdik", — dedi u.