Senator yoshlar bandligi va ijtimoiy himoyasi yuzasidan senatorga senator so‘rovi yubordi

Senatning Yoshlar, xotin-qizlar, madaniyat va sport masalalari qo‘mitasida doimiy asosda ishlovchi senator Malika Qodirxonova yoshlar bandligi va ijtimoiy himoyasi masalalari yuzasidan Yoshlar ishlari agentligi direktoriga senator so‘rovi yubordi.

 

Ma’lum qilinishicha,  so‘rovda ijtimoiy himoyaga muhtoj voyaga yetmagan yoshlarning huquqiy va ijtimoiy himoyasini kuchaytirish, ularni kasb-hunarga o‘qitish hamda ish bilan ta’minlash masalalariga e’tibor qaratilgan.

 

Senator so‘rovida 2026-yil aprel holatiga ko‘ra, Ichki ishlar vazirligi tizimidagi voyaga yetmaganlarga ijtimoiy-huquqiy yordam ko‘rsatish markazlaridan 14 638 nafar 16–17 yoshli o‘smir oilasiga qaytarilgani, ularning 2 671 nafari esa ID-kartaga ega emasligi keltirilgan.

 

Qayd etilishicha, oilasi bag‘riga qaytgan yoshlarning aksariyati ijtimoiy himoyaga muhtoj va yashash sharoiti og‘ir oilalar farzandlaridan iborat. Moliyaviy imkoniyatlar cheklangani sababli ayrim voyaga yetmaganlar o‘z vaqtida ID-karta ololmayotgani ta’kidlangan.

 

Senatorning fikricha, bu holat yoshlarni kasb-hunarga o‘qitish, bandligini ta’minlash va ijtimoiy dasturlarga jalb etishda qator muammolarni keltirib chiqarmoqda.

 

So‘rovda amaldagi qonunchilikka muvofiq, Yoshlar ishlari agentligining ijtimoiy himoyaga muhtoj yoshlarni qo‘llab-quvvatlash, ularni kasb-hunarga o‘qitish, tadbirkorlikka yo‘naltirish va bandligini ta’minlash bo‘yicha vazifalari belgilangani ham eslatib o‘tilgan.

 

Shu munosabat bilan agentlikdan ijtimoiy himoyaga muhtoj voyaga yetmagan yoshlarni qo‘llab-quvvatlash, ID-kartasi mavjud bo‘lmagan yoshlarni kasb-hunarga o‘qitish va ish bilan ta’minlashga ko‘maklashish, ularni manzilli qo‘llab-quvvatlash bo‘yicha rejalashtirilgan choralar haqida ma’lumot taqdim etish so‘ralgan.

 

Shuningdek, voyaga yetmaganlar o‘rtasida ishsizlik sabablarini o‘rganish, ularni bartaraf etish yuzasidan ishlab chiqilgan takliflar hamda mas’ul idoralar o‘rtasidagi hamkorlik mexanizmlarini takomillashtirish bo‘yicha amalga oshirilayotgan ishlar haqida asoslantirilgan axborot berish talab qilingan.