OAK faoliyatini Fanlar akademiyasi tizimida tashkil qilish rejalashtirilmoqda
Shuningdek, dissertatsiya himoyasi jarayonlarining 50 foizini raqamlashtirish hamda ortiqcha byurokratik talablarni bekor qilish taklif etildi.
Prezidentga taqdim etilgan taqdimotda Oliy attestatsiya komissiyasi faoliyatini tubdan takomillashtirish bo‘yicha yangi yondashuvlar muhokama qilindi. Unda Oliy attestatsiya komissiyasi faoliyatini Fanlar akademiyasi tizimida tashkil etish, dissertatsiya himoyasi jarayonlarining yarmini raqamlashtirish hamda ortiqcha byurokratik talablarni bekor qilish taklif etildi.
Taqdimotda ilmiy kengashlar mas’uliyatini oshirish va ularning faoliyatini reyting asosida baholash tizimini joriy etish rejalashtirilayotgani qayd etildi.
Shuningdek, ilmiy daraja berish jarayonlarini to‘liq raqamlashtirish orqali byurokratik tartib-taomillarni qisqartirish ko‘zda tutilmoqda. Ta’kidlanishicha, amaldagi dissertatsiya himoyasi jarayonidagi tartib-taomillarning 50 foizini raqamlashtirish hisobiga qisqartirish mumkin.
Takliflarga ko‘ra, ko‘p sonli hujjatlarni chop etish, avtoreferatlarni katta hajmda tayyorlash hamda dissertatsiyalarni takroran muhokama qilish bilan bog‘liq ortiqcha talablar bekor qilinadi. Bu esa izlanuvchilar uchun vaqt va mablag‘ sarfini kamaytirishga xizmat qilishi aytildi.
Taqdimotda ilm-fan va iqtisodiyotning real sektori integratsiyasini kuchaytirishga qaratilgan “Loyiha doirasida ilmiy daraja” hamda “Amaliy doktorantura” dasturlarini joriy etish taklifi ham ko‘rib chiqildi. Unga muvofiq, PhD darajasini amaliy tadqiqot loyihasi doirasida olish imkoniyati yaratiladi.
Qayd etilishicha, doktorlik tadqiqotlari ishlab chiqarish va iqtisodiyotning amaliy ehtiyojlaridan kelib chiqib shakllantiriladi hamda ilmiy izlanishlar real sektor korxonalari bilan hamkorlikda olib boriladi.
Bundan tashqari, ilmiy loyihalarni moliyalashtirish va saralash tizimini takomillashtirish, xalqaro ekspertlarni jalb qilish hamda raqamli texnologiyalar asosida baholash mexanizmlarini joriy etish bo‘yicha takliflar bildirildi.
Taqdimotda akademik halollik va tadqiqot sifati ustidan nazoratni kuchaytirish masalalariga ham alohida e’tibor qaratildi.
Xususan, olimlarning ilmiy faoliyatini kuzatishning yagona raqamli tizimini yaratish, ilmiy etika standartlarini takomillashtirish va monitoring mexanizmlarini joriy etish rejalashtirilayotgani ma’lum qilindi.
