Oq uy amerikalik olimlarning JSST bilan aloqasini cheklamoqda

 

AQSh prezidenti Donald Tramp ma’muriyati Milliy allergiya va yuqumli kasalliklar instituti xodimlariga Jahon sog‘liqni saqlash tashkiloti (JSST) bilan bevosita aloqa qilishni taqiqladi. Bu haqda CNN telekanali hujjatlar va manbalarga tayanib xabar berdi.

Ma’lumotlarga ko‘ra, ushbu cheklovlar dastlab hantavirus bilan bog‘liq epidemiologik vaziyat fonida joriy etilgan. Keyinchalik Kongo Demokratik Respublikasida Ebola virusi tarqalishi sabab ayrim cheklovlar qisman yumshatilgan.

Xabarda aytilishicha, AQSh Milliy allergiya va yuqumli kasalliklar institutining ayrim xodimlariga endilikda JSSTning virtual yig‘ilishlarida faqat kichik guruhlar tarkibida va tinglovchi sifatida qatnashishga ruxsat berilgan.

CNN ma’lumotiga ko‘ra, JSST bilan bog‘liq keyingi barcha amaliy harakatlar AQSh Sog‘liqni saqlash va ijtimoiy xizmatlar vazirligi orqali amalga oshiriladi.

Avvalroq AQSh prezidenti Donald Tramp mamlakat mutaxassislari hantavirusni faol o‘rganayotganini ma’lum qilgan edi. Uning ta’kidlashicha, amerikalik olimlar ushbu virusning xususiyatlarini yaxshi biladi va u bilan uzoq yillardan beri shug‘ullanib kelmoqda.

Shuningdek, Tramp hantavirus koronavirusdan farqli ravishda odamdan odamga oson yuqmasligini ham qayd etgan.