AQSh Hormuz bo‘g‘ozida Eron obyektlariga hujum uyushtirdi

 

AQSh harbiylari Eron janubidagi ayrim harbiy nishonlarga zarba berganini ma’lum qilindi. Bu haqda AQSh Markaziy qo‘mondonligi vakili kapitan Tim Xokinsning bayonotiga tayanib Fox News jurnalisti Jennifer Griffin xabar berdi.

AQSh harbiylari bayonotiga ko‘ra, zarbalar “o‘zini himoya qilish” maqsadida amalga oshirilgan. Nishonlar sifatida raketa uchirish qurilmalari hamda Hormuz bo‘g‘ozida minalar joylashtirishga uringan Eron qayiqlari ko‘rsatilgan.

“Bugun AQSh kuchlari Eron kuchlarining tahdidlaridan harbiylarimizni himoya qilish maqsadida Eron janubida mudofaa xarakteridagi zarbalarni amalga oshirdi”, — deyiladi bayonotda.

Fox News ma’lumotiga ko‘ra, AQShning yuqori lavozimli rasmiysi Hormuz bo‘g‘ozida Islom inqilobi qo‘riqchilari korpusiga tegishli ikkita kemaning yo‘q qilinganini bildirgan. Shuningdek, Bandar Abbos portida joylashgan yer-havo raketa tizimiga ham zarba berilgani aytilmoqda. AQSh tomoni ushbu tizim Amerika harbiy samolyotlarini nishonga olganini da’vo qilgan.

AQSh vakillari hujumlar sulhni buzishga qaratilmaganini ta’kidlab, Vashington Eron bilan amaldagi sulh doirasida “vazminlik siyosatini” davom ettirayotganini bildirgan.

Jennifer Griffinning yozishicha, AQSh zarbalari yakunlangan va ular hujumkor emas, balki mudofaa maqsadida amalga oshirilgan.

Eronning Tasnim axborot agentligi esa Bandar Abbos hududida kamida uchta portlash ovozi eshitilganini ma’lum qilgan.

Eslatib o‘tamiz, AQSh va Eron o‘rtasida aprel oyida sulh e’lon qilingan edi. Keyinchalik AQSh prezidenti Donald Tramp ushbu sulh muddatini noma’lum vaqtga uzaytirganini bildirgan. Shunga qaramay, may oyida Hormuz bo‘g‘ozi hududida ikki tomon o‘rtasida yana harbiy to‘qnashuvlar yuz bergan edi.